ҺАВА ТОРЫШЫ -10 oC

Яңалыклар

барлык хәбәрләр Татарстан Россия

Мәдәният

Башкортстанның “Балтач таңнары” татар газетасы үзенең юбилеен билгели

14 сентябрь 2006, 16:47

(Уфа, 14 сентябрь, “Татар-информ”, Фәнис Фәтхуллин). Башкортстанның Балтач районындагы “Балтач таңнары” газетасы редакциясе өчен бу көннәр күңелле мәшәкатьләр эчендә үтә. Район халкы арасында бик популяр булган бу басма үзенең 75 еллык күркәм юбилеен билгели. Шушы уңайдан биредә байтак тантаналы чаралар оештырыла. Иртәгә район газетасы юбилее уңаеннан тантаналы кичә дә була.

“Балтач таңнары” татар газетасының тарихы бай да, эчтәлекле дә. Төрле зилзиләле елларда исемнәрен берничә тапкыр алмаштырса да, үзенең төп кыйбласын үзгәртми ул – район халкына кызыклы һәм эчтәлекле язмалар, теге яки бу вакыйгалар хакында яңалыкларны көне-сәгате белән җиткереп тора.

Бу иҗади коллективта милләтебезнең әллә күпме талантлы шәхесләре, танылган журналистлар һәм язучылар тәбияләнеп чыккан. Баштагы өч елда бу басма күршедәге Тәтешле һәм Аскын районнары халкына да таратыла. Сугыштан соңгы елларда бу басмага талантлы мөхәррирләр Хәмит Якупов, Нурислам Нуретдинов, Рафик Бабич, Хәким Шәймөхәммәтов, Әнвәр Әхмәтҗанов, Марс Шәрипов, Әнис Таҗетдиновлар җитәкчелек итә.

2004 елдан газетаның баш мөхәррире вазыйфасын талантлы журналист һәм булдыклы оештыручы Рөстәм Мәүли улы Вәлиев башкара.

Бүгенге көндә “Балтач таңнары” татар телендә 6000 данәдә чыгып килә. Райондагы марилар белән удмуртлар да алдырып укый аны. Газетаны укымлы итеп чыгаруга сәләтле һәм тәҗрибәле журналистлар Розалия Галләмова, Аида Хәйретдинова, Дамир Хәйретдинов, Римма Вәлиева һәм башкалар зур өлеш кертә. Юбилей уңаеннан ихлас котлаулар һәм җылы теләкләр кабул итә алар бу көннәрдә.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10