Муниципаль берәмлекнең вәкиллекле органына депутатлар сайлау 10 октябрьдә узачак

(Казан, 16 июль, “Татар-информ”, Айгөл Фәхретдинова). Бүген Казан шәһәр Думасының 52 нче сессиясендә икенче чакырылыш Дума депутатларын сайлау көне билгеләнде.
Казан мэры Илсур Метшин искәртүенчә, беренче чакырылышның 5 елга исәпләнгән вәкаләтләре тиздән тәмамлана. Инде күчеш чорының кыенлыклары артта калган, җирле үзидарәләр үсеше өчен ныклы нигез салынган. “Җирле үзидарәләрне оештыруның гомуми принциплары турында”гы федераль закон нигезендә, сайлауларны билгеләү муниципалитетларның вәкиллекле органы компетенциясенә керә. Аның вакытын билгеләү һәм уздыру сайлауларга кагылышлы законнар белән көйләнә. “Тавыш бирү көннәре итеп, федераль канун нигезендә, мартның һәм октябрьнең икенче якшәмбесе расланган. Шуннан чыгып, 2010 елгы муниципаль сайлаулар 10 октябрьгә билгеләнергә тиеш”, - дип белдерде мэр.
Шәһәр Думасының муниципаль берәмлекнең вәкиллекле органына депутатлар сайлауларны 10 октябрьгә билгеләү турындагы карары 5 көннән дә соңга калмый “Казанские ведомости” һәм “Шәһри Казан” газеталарында рәсми рәвештә басылып чыкканнан соң, тулы көченә керә.
Илсур Метшин белдергәнчә, бу сайлаулар Казан өчен үзенчәлекле булачак. Казанның вәкиллекле органы беренче мәртәбә катнаш система нигезендә формалашачак. Моннан 5 ел элек тәүге муниципаль сайлаулар 50 бер мандатлы округ буенча узган иде. Хәзер җирле депутатларның яртысы, гамәлдәге законнар нигезендә, партия исемлеге буенча сайланырга тиеш. Шәһәр Уставына кертелгән үзгәрешләр нигезендә, җирле депутатларның 25 е бер мандатлы округлардан, калган яртысы партия исемлекләре буенча сайланачак. Башкалада сайлауларны әзерләүдә төп җаваплылык үзәге шәһәр сайлау комиссиясе булачак.