Агымдагы елда республикада – 7200, киләсе елда тагын 8 мең исәпләү приборы урнаштыру күздә тотыла

(Казан, 22 июль, «Татар-информ», Наталья Рыбакова). Быел Татарстанда торак йортларда 7200 исәпләү приборы урнаштыру күздә тотыла. Киләсе елда исә тагын 8 мең прибор урнаштырылачак. Энергия саклау турындагы закон 2013 елның 1 гыйнварына кадәр барлык исәпләү приборларының да урнаштырылуын таләп итә.
Бүген ТР төзелеш, архитектура һәм торак-коммуналь хуҗалык министрының беренче урынбасары Рәүзил Хаҗиев ТР Төзелеш, архитектура һәм торак-коммуналь хуҗалык министрлыгында узган кышка әзерлек штабының икенче утырышында әнә шул хакта хәбәр итте.
Исәпләү приборларын урнаштыру өчен дәүләт акчасы гына җитмәгәнлектән, әлеге максатларга инвесторларның акчалары җәлеп ителде. Республика торак йортларында җылылык, су, электр энергиясен исәпләүче уртак приборлар куела. Аларны күпләп урнаштыру август-сентябрь айларына туры киләчәк.