Казанда 2010-2011 еллардагы ягу сезонына әзерлек штабының икенче утырышы узды

(Казан, 22 июль, «Татар-информ», Наталья Рыбакова). Бүгенге көндә Казанда планлаштырылган 754 социаль өлкә объектының 548 е (73 процент) һәм 4738 торак йортның 3626 сы (75 процент) алда торган ягу сезонына әзер.
Бүген шәһәр Торак-коммуналь хуҗалыгы комитеты рәисенең беренче урынбасары Марат Мәхмүтов Казанны алда торган кышка әзерләүнең барышы хакында сөйләде. ТР Төзелеш, архитектура һәм торак-коммуналь хуҗалык министрлыгында узган утырышны ТР төзелеш, архитектура һәм торак-коммуналь хуҗалык министрының беренче урынбасары Рәүзил Хаҗиев үткәрде.
Марат Мәхмүтов хәбәр иткәнчә, шәһәрдә җылылык челтәрләрен капиталь төзекләндерү һәм реконструкция эшләре дәвам итәчәк. “Казан җылылык челтәрләре” ААҖнең алда торган ягу сезонына әзерлеге – 55, “Казэнерго җитештерү берләшмәсе” муниципаль унитар предприятиесенең әзерлеге 63 процент тәшкил итә. “Водоканал” муниципаль унитар предприятиесе суүткәргеч һәм канализация челтәрләрен капиталь ремонтлауны өлешчә үтәгән, предприятие ягу сезонына 65 процентка әзер.
Ягу сезонына әзерлек максатларында шәһәрдә көн саен оператив штаб утырышы уза. Тулаем алганда, бүгенге көндә Казандагы коммуналь хуҗалык предприятиеләренең әзерлеге 65 процент тәшкил итә, эшләр график буенча алып барыла. Шәһәрдә хәрби шәһәрчекләрдә, шул исәптән шуларның берсе территориясендә урнашкан балалар бакчасында кайнар су белән тәэмин итүгә бәйле кайбер проблемалар бар. Агымдагы елда шәһәр йортларында 2168 исәпләү приборы урнаштыру күздә тотыла.
Рәүзил Хаҗиев билгеләп үткәнчә, торак йортларда исәпләү приборлары куюны тизләтергә, ә хәрби шәһәрчектәге балалар бакчасын индивидуаль җылытуга күчерергә кирәк.