Быел изге Рамазан ае, 11 августта башланып, 8 сентябрьдә тәмамлана. Рамазан аендагы беренче тәравих намазы 10 августта ястү намазыннан соң укыла

(Казан, 22 июль, “Татар-информ”, Римма Гатина). “Иман” нәшрияты татар телендә “Рамазан. Ураза” дигән китап бастырып чыгарды. Ул изге Рамазан аенда ураза тотуга багышланган.
Анда ураза тотуның асылы, өстенлекләре, әҗере күрсәтелә. Ничек итеп ураза тотуның тәртибе аңлатыла, гамәли киңәшләр бирелә. Сәхәр һәм ифтар вакытында укый торган догалар, ниятләү сүзләре китерелә. Аерым бүлектә уразаның сәламәтлек өчен файдасы турында сөйләнә.
Шулай ук китапта Рамазан ае өчен намаз вакытлары, сәхәр ашау һәм авыз ачу вакытлары бирелә. Бу хакта Islamrt.ru хәбәр итә.
Билгеле булганча, быел изге Рамазан ае, 11 августта башланып, 8 сентябрьдә тәмамлана. Рамазан аендагы беренче тәравих намазы 10 августта ястү (кичке намаз) намазыннан соң укыла. Чөнки 10 августта, кояш баю белән, Рамазан ае башлана.
Рамазан ае тәмамланып, аннан соң килә торган Шәүвәл аенда 6 көн ураза тоту саваплы санала.