Теплицаларда һава 36-38 градуска кадәр җылына, шул ук вакытта тәүлеклек уртача температура 19 градустан да артмаска тиеш

(Казан, 23 июль, «Татар-информ», Ирина Игнатьева). “Майский” теплица комбинаты” ҖЧҖ хезмәткәрләре көннәрнең эссе булуы сәбәпле теплицалардагы пыялаларны агартырга мәҗбүр. Теплицаларда һава 36-38 градуска кадәр җылына, шул ук вакытта тәүлеклек уртача температура 19 градустан да артмаска тиеш. Бу хакта “Татар-информ” агентлыгына комбинатның генераль директоры Илшат Ганиев хәбәр итте.
Пыялаларны агарту нәтиҗәсендә теплицаларда һава температурасын 25-26 градуска кадәр төшерергә мөмкин булачак. Дөрес, комбинат соңгы елларда файдалануга тапшырган заманча теплицалар белән проблемалар юк диярлек, чөнки аларда махсус пәрдәләр каралган. Алар белән үсемлекләр өчен чагыштырмача оптималь микроклимат булдырып, теплица пыялаларын тулысынча яки өлешчә ябарга мөмкин.
Шул ук вакытта И.Ганиев быелгы уңышның язмышына борчыла. Эсселек аркасында кыяр һәм помидорларның серкәләнүе 40-50 процентка кимегән. Бу уңышны җыйган вакытта яшелчәләр аз да, вак та булачак дигән сүз. Шуңа күрә комбинатта су җитмәүгә бәйле бернинди проблема булмаса да, корылык аркасында яшелчәчеләр зыян күрергә мөмкин.