Төркиянең Гаилә һәм хатын-кызлар эшләре буенча министры Сәлма Каваф: “Хиҗапны тыючы закон юк. Әмма практикада авырлыклар бар”, - дип әйтергә мәҗбүр булган

(Казан, 23 июль, “Татар-информ”). БМОның Хатын-кызларга карата дискриминациянең барлык формаларын бетерү турындагы Конвенциясен тормышка ашыруга багышланган утырышында Төркия министрыннан бу илнең уку йортларында һәм дәүләт оешмаларында яулыкны тыюның сәбәбен сорадылар.

Төркиянең Гаилә һәм хатын-кызлар эшләре буенча министры Сәлма Алия Каваф утырышта Төркиядәге хатын-кызларның хәле турында чыгыш ясады. Аның сүзләренә караганда, Төркиядә хатын-кызлар һәм ир-атларның тигез хокуклыгын тәэмин итү теләге зур. Агымдагы елның 12 сентябренә билгеләнгән референдум хатын-кызларның хокуклары үсешендә һәм хатын-кызлар һәм ир-атларның тигез хокуклыгын тәэмин итүдә мөһим адым булырга тиеш.

БМО утырышында, министр чыгышыннан тыш, Төркиянең хатын-кызларның иҗтимагый оешмалары тарафыннан әзерләнгән доклад та тыңланды. Адвокат Фатма Бәнли Сәлма Кавафның: “Төркиядә хатын-кызлар, нинди кием киюенә кармастан¸ җәберләнми” дигән сүзен тәнкыйть утына тотты. Адвокат сүзләренә караганда, хиҗап кию аркасында, меңләгән кыз белем ала алмый, хатын-кызлар дәүләт оешмаларына эшкә урнаша алмый. Министрдан хиҗапны тыюның сәбәпләре турында сорадылар. Сәлма Каваф: “Хиҗапны тыючы закон юк. Әмма практикада авырлыклар бар”, - дип әйтергә мәҗбүр булган.

Хатын-кызларга карата дискриминациянең барлык формаларын бетерү буенча комитет, доклад һәм рапортны карап, ике атна дәвамында Төркиягә карата карар чыгарачак, дип хәбәр итә Zaman.com.tr .