Сервис һәм сатулар хезмәте генә эшен дәвам итәчәк

(Казан, 26 июль, «Татар-информ», Наталья Рыбакова). 2-27 август көннәрендә “КАМАЗ” ААҖ хезмәткәрләренең күбесе түләүле еллык корпоратив ялга китәчәк. Сервис һәм сатулар хезмәте генә эшен дәвам итәчәк. Бу хакта бүген предприятиенең җәмәгатьчелек белән элемтәләр департаментыннан хәбәр иттеләр.
“КАМАЗ” ААҖ җитәкчелеге узган ел профсоюз комитеты белән бергә август аенда еллык корпоратив ялга китү турында карар чыгара. Моңарчы хезмәткәрләр ялга чиратлап китә. Әмма ялга коллектив белән китү предприятиегә электр энергиясе ресурслары һәм башкаларга чыгымнарны кыскартырга мөмкинлек бирә. “Без Бөтендөнья автомобиль сәнәгате юлыннан киттек һәм чыгымнарны киметү өчен бөтен хезмәткәрләрне ялга берьюлы җибәрү максатка ярашлы булачак дигән карарга килдек”, - диделәр предприятиедә.
Компаниядә 45 меңгә якын кеше эшли. Аларның 5 меңгә якыны августта үзләренең эш урыннарында калса, калганнары ялга китәчәк. Җитештерүне туктату вакыты гадәттә тәүлек әйләнәсе эшләүче җиһазларны ремонтлау өчен файдаланылачак.