Татарстан предприятиеләре белән ике арада хезмәттәшлекне үстерү юнәлешләре анда күтәрелгән төп тема булды

(Казан, 27 июль, “Татар-информ”). Бүген ТР сәнәгать һәм сәүдә министры Равил Зарипов SIEMENS компаниясе вәкилләре белән очрашты. Хезмәттәшлек юнәлешләре каралган бу очрашуда шулай ук “Казан компрессормаш”, “Казан мотор төзү” җитештерү берләшмәсе” ААҖ вәкилләре катнашты, дип хәбәр итә министрлыкның матбугат хезмәте.
Равил Зарипов кунакларны Татарстанда сәнәгатьнең үсеш перспективалары белән таныштырды. Аерым алганда, ТАНЕКО проекты, энергетика комплексы, Универсиада объектлары төзелеше, республика предприятиеләренең “Россия тимер юллары”, “Роснефть”, “Лукойл”, “Газпром” кебек эре компаниләр белән хезмәттәшлеге хакында сөйләде.
Министр ассызыклаганча, Татарстанда үсеш нокталары берничә юнәлештә билгеләнгән. Алар – нефть эшкәртү, автомобиль төзелеше, энергетика, авиатөзелеш. “Без SIEMENS белән шушы барлык юнәлешләр буенча хезмәттәшлекне үстерергә өметләнәбез, аеруча инновация технологияләренә мохтаҗлык зур”, - дип белдерде Татарстан министры.
SIEMENS вәкилләре, үз чиратында, республиканың кайбер предприятиеләрендә булуларын хәбәр итте. “Казан органик синтез” җәмгыятендә узган очрашуда, мәсәлән, предприятиене SIEMENS та җитештерелгән приводлар белән тәэмин итү буенча хезмәттәшлекне үстерү хакында сөйләшенгән. “ИНВЭНТ” җәмгыятендә узган очрашуда исә “Инвент-электро” компаниясе базасында ешлыклы приводлар җитештерүне җайга салу буенча сөйләшү булган. Бүген “КЭР-инжениринг” җитәкчелеге белән очрашуда SIEMENS вәкилләре шундый ук приводлар производствосын әлеге предприятие базасында оештыру хакында фикерләшергә җыена.
Министрлыкта узган очрашуда катнашкан “Казан мотор төзү” җитештерү берләшмәсе” , “Казан компрессормаш” белгечләре дә әлеге компания белән хезмәттәшлекне үстерү теләген белдерде.