ТР авыл хуҗалыгы һәм азык-төлек министры ТР Президенты күрсәтмәсе буенча республика районнары белән селектор киңәшмәсе үткәрде

(Казан, 28 июль, «Татар-информ», Ирина Игнатьева). Бүген ТР Премьер-министры урынбасары - авыл хуҗалыгы һәм азык-төлек министры Марат Әхмәтов ТР Президенты күрсәтмәсе буенча республика муниципаль районнары башлыклары белән селектор киңәшмәсе үткәрде. Киңәшмәдә агросәнәгать компанияләре һәм холдинглары генераль директорлары, авыл хуҗалыгы берләшмәләре җитәкчеләре, ТР Авыл хуҗалыгы һәм азык-төлек министрлыгы вәкилләре һәм башкалар катнашты.
М.Әхмәтов иң элек бөртеклеләрне урып-җыю эшенә игътибар юнәлтте. Бүгенге көндә бөртекле культуралар 400 мең гектар мәйданда суктырылган, бу урып-җыеласы мәйданның 50 проценттан артыгы дигән сүз. 400 мең тонна чамасы ашлык җыеп алынган. Уңыш гектарыннан 9 центнердан артык тәшкил итә.
Шуңа бәйле рәвештә ТР авыл хуҗалыгы һәм азык-төлек министры аграрийлар алдына бөртеклеләрне урып-җыю эшләрен июль аенда төгәлләү бурычын куйды. Тулаем алганда, урак озакка сузылган очракта салам әзерләү күләме дә кими, быелгы корылык шартларында исә ул кыйммәтле терлек азыгы булачак.