Карабодайның 1 килограммы узган атнада 40 сум 74 тиен, бодай оны -15 сум 84 тиен торды

(Казан, 28 июль, “Татар-информ”, Айгөл Фәхретдинова). Сәүдә нокталарына бәрәңгенең яңа уңышы чыгу сәбәпле, бу төр туклану продуктының уртача бәясе узган атнада Казанда 19 процентка күтәрелгән. Аның килограммы уртача 19 сум 14 тиеннән сатыла. Башка яшелчәләргә килгәндә, башкаланың сәүдә нокталарында соңгы бер атнада кишер бәясе 2,8 процентка күтәрелеп, килограммы 33 сумнан сатылган. Ә менә кәбестә һәм башлы суган бәясе, Татарстанстат хәбәрләренә караганда, бераз төшкән. Беренчесенең килограммы 29 сум 31 тиен, икенчесенеке – 29 сум 96 тиен тора.
Карабодай ярмасы һәм бодай онына кулланучы тарафыннан сорау арту бу төр продуктлар бәясенең сизелерлек үсешенә китергән. Карабодай ярмасының 1 килограммы бәясе якынча 23 процентка артып, 40 сум 74 тиен, бодай оны якынча 9 процентка кыйммәтләнеп, аның килограммы 15 сум 84 тиен торган. Узган атнада шулай ук токмач, тары, дөге ярмалары, тавык ите, шикәр комы һәм сыер ите дә кыйммәтләнгән. Токмачның килограммы уртача 27 сум 52 тиеннән, тары ярмасы -17 сум 7 тиеннән, дөге ярмасы- 35 сум 66 тиеннән, тавык ите – 92 сум 33 тиеннән, шикәр комы – 31 сум 83 тиеннән, сыер ите -167 сум 6 тиеннән сатылган.
Йомырка бәясе исә 2,4 процентка төшкән, туңдырылган балык, сырлар, каймак 0,5-1,9 процентка арзанайган.