Биредә ТР Сәүдә-сәнәгать палатасы белән “Business Gate” итальян программасының Халыкара икътисади мөнәсәбәтләрне үстерү буенча комиссиясе арасында хезмәттәшлек турында сүз бара

(Казан, 28 июль, “Татар-информ”). Кичә Казанда ТР Сәүдә-сәнәгать палатасы белән “Business Gate” итальян программасының Халыкара икътисади мөнәсәбәтләрне үстерү буенча комиссиясе арасында хезмәттәшлек турындагы Меморандум имзаланды. Әлеге документ белән Татарстан һәм Италия арасындагы ике республика эшмәкәрләре арасындагы хезмәттәшлекне җанландыруның төп юнәлешләре билгеләнде, бу исә, гомумән алганда, инвесторларның капитал кертүенә уңай шартлар тудыруны күздә тота.

ТР Сәүдә-сәнәгать палатасыннан алынган шәрехләмәдә әйтелгәнчә, Меморандумда якларның бизнес өлкәсендә, инвестицияләр һәм сәүдә буенча мәгълүмат алмашу теләге булуы, сәүдә-икътисад миссияләрен оештыру, Татарстан продукциясен Италиядә һәи Италия продукциясен Татарстанда көндәшлеккә сәләтлелеген һәм сыйфатын арттыруга алшарт булдыру, уртак предприятиеләр ачу, уртак күргәзмәләр һәм бизнес-очрашулар үткәрү һ.б. нияте булуы әйтелә. ТР Сәүдә-сәнәгать палатасы идарәсе рәисе Шамил Агиев белән Халыкара икътисади мөнәсәбәтләрне үстерү буенча комиссиясе президенты Розарио Салеми имзаларын салган Меморандумда шулай ук, товар алмашуны җиңеләйтү максатында, якларның закон һәм норматив актлар экспертизасында катнашу теләге булуы хакында да анда билгеләп үтелә.