Конкурсның төп шарты - җырлар ислам тематикасында булырга тиеш

(Казан, 28 июль, “Татар-информ”). 23-24 августта Чувашстанның Урмай авылында «ART-MEDXIA» дип аталган фольклор һәм эстрада җырлары фестивале булачак. Әлеге фестиваль Рамазанга багышлана.
«ART-MEDXIA» мөселман җыр сәнгатен үстерү максатыннан оештырыла. Төбәкара дуслыкны ныгыту, мөселман татарларның иң матур йола-гадәтләрен саклап калу да чараның төп максатлары булып тора.
Конкурсның төп шарты - җырлар ислам тематикасында булырга тиеш. Дини темага җырлар татар халкында мөнәҗәт, дип атала. Соңгы елларда дини нәшидләр дә җырлана башлады. Әлеге фестиваль мөнәҗәт, нәшид жанрларын тагын да үстерү, җәелдерү максатыннан үткәрелә.
Чараны Чувашия Республикасы татарлары милли-мәдәни мохтәрияте, Комсомольск районы хакимияте, Комсомольск балалар сәнгать мәктәбе, Урмай авыл җирлеге оештыра. Чарада Россиянең төрле төбәкләреннән музыка төркемнәре, җырчылар катнаша ала. Жюри сыйфатында танылган сәнгать белгечләре чакырылачак, дип хәбәр итә Tatar-islam.ru.