Ул нибары 400 тонна ашлык җыеп алачак, бу узган елга караганда 5 тапкыр кимрәк

(Казан, 29 июль, «Татар-информ», Ирина Игнатьева). Балык Бистәсе районының “Үрнәк” фермер хуҗалыгы җитәкчесе Альберт Рәшитов корылык аркасында 5 миллион сумлык зыян күрәчәк. Ул нибары 400 тонна ашлык җыеп алачак, бу узган елга караганда 5 тапкыр кимрәк. Хуҗалыкта игелә торган азык культураларын корылык тулысынча юк иткән. Бу хакта “Татар-информ” агентлыгына А.Рәшитов хәбәр итте.
400 тонна ашлыкның 300 тоннасын орлыкка салырга кирәк. Шул рәвешчә, җитештерелгән продукциядән табыш бик аз булачак.
Фермерны инде бүген үк булачак уңышның язмышы борчый. А.Рәшитов орлыкка салган 300 тонна ашлыкның сыйфаты бик түбән, чөнки игеннәр быелгы җәйнең аномаль һава торышы шартларында өлгерде. Димәк, язын сыйфатлы ашлык сатып алырга туры киләчәк, ә моның өчен акча кирәк. А.Рәшитовка озак сроклы банк кредиты алудан башка чара юк.
Райондагы башка фермерларның хәле дә шул чама. А.Рәшитов бу хакта яхшы белә. Ул Татарстанның Балык Бистәсе районы Фермерлар һәм крестьян хуҗалыклары ассоциациясен җитәкли.