Президент белдерүенчә, ТР сәнәгать предприятиеләре белгечләр әзерләүдә үзебезнең вузларга, белем бирү үзәкләренә йөз тотарга тиеш

(Казан, 29 июль, "Татар-информ", Айгөл Фәхретдинова). Бүген республика сәнәгатьчеләре белән очрашуда Рөстәм Миңнеханов белдергәнчә, һәр тармакны акчаларсыз, ниндидер өстенлекләр бирмичә, дәүләт тарафыннан ярдәм күрсәтелми генә модернизацияләп булмый. Бүген моны әле эре сәнәгать предприятиеләре генә башкарала. Шуңа да карамастан, ди ул, бу юнәлештә эшне дәвам итәргә кирәк. Ә республика җитәкчелеге Предприятиеләр һәм эшмәкәрләр ассоциациясенә һәрьяклап ярдәм итәргә әзер, дип белдерде ул.
Сәнәгатьчеләрне борчыган тагын бер проблема - техник кадрларга зур кытлык булу. Икътисад өчен кадрлар әзерләүгә килгәндә, сәнәгатьчеләр ассоциациясе мәгариф учреждениеләре белән хезмәттәшлекнең яңа формаларын эзләргә тиеш, ди Президент. Рөстәм Миңнеханов белдерүенчә, ТР сәнәгать предприятиеләре белгечләр әзерләүдә үзебезнең вузларга, белем бирү үзәкләренә йөз тотарга тиеш. Бүген ТР кайбер вузлары профильле булмаган, шулай ук хезмәт базарында сорау тапмаган белгечлекләр әзерләү белән мавыга. Аның фикеренчә, икътисадчыларны республикада Казан дәүләт финанс-икътисад институты, юристларны Казан (Идел буе) федераль университеты әзерләргә тиеш. Ә Казан дәүләт техник университеты икътисадчылар әзерләү белән мавыкмыйча, төп көчне инженерлар әзерләүгә бирергә тиеш.