Татарстанда 188 юридик, 1412 вазифаи зат, 256 авыл җире башлыгы һәм 1055 граждан административ җаваплылыкка тартылган

(Казан, 30 июль, “Татар-информ”, Миләүшә Низаметдинова). Янгын куркынычсызлыгы таләпләрен бозган өчен быел Татарстанда 188 юридик, 1412 вазифаи зат, 256 авыл җире башлыгы һәм 1055 граждан административ җаваплылыкка тартылган. Аларга салынган гомуми штраф суммасы 4,58 млн. сум тәшкил иткән.

Шул исәптән янгынга каршы торыр өчен су белән тәэмин ителеш таләпләрен үтәмәгән 63 юридик, 288 вазифаи зат, авыл җирләрендәге 186 җитәкче һәм 445 объект башлыгы закон алдында җавап тоткан. Мәсәлән, ут каба калса су алынырга тиешле чыганакларның булганнары да, вакытында карап куелмаганга, әле дә төзек булмавы мәгълүм. Россия Гадәттән тыш хәлләр министрлыгының ТР буенча Төп идарәсе җитәкчесе урынбасары Андрей Орлов шәрехләгәнчә, Актаныш районында янгынга каршы тору өчен каралган 42 су чыганагының 2се (4,8 проценты), Бөгелмә районында 87сенең 5е (5,7 проценты), Яшел Үзән районында исә 35енең 7се (20 проценты) төзек түгел һәм бу мәсьәләдә мондый караш болай да четерекле вазгыятьне тагын да катлауландыра гына.