ТР Премьер-министрының беренче урынбасары Равил Моратов Татарстан районнарына әлеге тәҗрибәне кулланырга киңәш итте

(Казан, 31 июль, "Татар-информ", Нина Нарыкова). Якын көннәрдә урман янгыннары чыккан урыннарны дельталетлар эзли башлаячак. Бүген ТР Премьер-министрының беренче урынбасары Равил Моратов Татарстан районнарына әлеге тәҗрибәне кулланырга киңәш итте.
“Дельталетлар – иң арзан авиатранспорт, өстәвенә бу әле спорт та. Алардан киң файдаланырга кирәк. Районнар өчен бу зур ярдәм булыр, дип уйлыйм”, - диде вице-премьер ТР Гадәттән тыш хәлләрне кисәтү һәм бетерү, янгын куркынычсызлыгын тәэмин итү комиссиясе утырышында.
Бүгенге көндә Татарстанда 15 берәмлектән артык шундый техника бар. Якын көннәрдә алар Кама аръягы һәм төньяк – Казан зоналарында кулланыла башлаячак.
Бер дельталетның бәясе 200 мең сумнан алып 1 миллион сумга кадәр җитә. Машиналар тизлекне сәгатенә 100 чакрымга кадәр җиткерергә сәләтле. “Авиатранспортның әлеге төре вертолет һәм самолетлардан аермалы булурак, безнең өчен күпкә отышлы”, - дип ассызыклады Равил Моратов. Ул дельталетларны видеокүзәтү системасы белән җиһазландырырга киңәш итте, шулай ук Татарстан муниципаль берәмлекләре башлыкларына дельтапланерчыларны (алар районнарга янгынга бәйле вәзгыятькә мониторинг үткәрүдә ярдәм күрсәтү өчен киләчәк) берничә көнгә торак белән тәэмин итәргә күрсәтмә бирде.