“Шунысы куандыра, бүгенге студентларны белем алу, сессияләр тапшыру һәм дипломнар яклау гына түгел, үз вузларының иҗтимагый тормышында һәм спорт чараларында актив катнашу да берләштерә”, - дип ассызыклады министр

(Казан, 25 гыйнвар, «Татар-информ»). Татарстан мәгариф һәм фән министры Альберт Гыйльметдинов республика студентларын бүген билгеләп үтелә торган Татьяна көне белән котлады.
ТР мәгариф һәм фән министрының министрлыкның матбугат хезмәте тараткан котлавында мондый юллар бар:
“Кадерле дуслар! Бүгенге көндә студент исемен горур йөртүчеләрне, кайчандыр студент булган һәм күңеле белән һәрвакытта да яшь калучыларның барысын да Россия студентларының яраткан бәйрәме – Татьяна көне белән ихлас котлыйм!
Татарстан хаклы рәвештә Россиянең иң зур белем бирү һәм фәнни үзәкләреннән берсе санала. Сезнең һәркайсыгыз студент елларын, югары уку йортларындагы дусларын һәм укытучы-остазларын аерым бер җылылык белән искә алачагына ышанам.
2013 елда Казанда Җәйге Универсиада узачак. Шунысы куандыра, бүгенге студентларны белем алу, сессияләр тапшыру һәм дипломнар яклау гына түгел, үз вузларының иҗтимагый тормышында һәм спорт чараларында актив катнашу да берләштерә. Актив яшәү рәвеше алып барыгыз, спорт белән шөгыльләнегез һәм аңа үз дусларыгызны да җәлеп итегез! Сез яшь һәм энергиягез ташып тора, ә яшьләр һәм кыюлар өчен ирешеп булмастай берни дә юк.
Бөтен гомерегез буе белем алу процессыннан берни белән дә чагыштырып булмаслык канәгатьлек алуыгызны телим.
Әгәр мәшһүр галим булырга телисез икән – фәннең биек үрләре сезгә буйсынсын, танылган кеше булырга телисез икән – бөтен өметләрегезне чынга ашыру өчен барысы да җай килеп торсын. Сез барысына да ирешерсез дигән өметтә калам! Бәхет, уңышлар һзәм үзегезгә ышанычны югалтмавыгызны телим!”
Белешмә өчен. Бүгенге көндә республикада 200 меңнән артык студент исәпләнә. 30 университет, академия һәм институтлар, 100 дән артык көллият һәм техникумнар икътисадның барлык тармаклары өчен кирәкле квалификацияле белгечләр әзерли.