Указ басылып чыккан көненнән үз көченә керә

(Казан, 26 гыйнвар, «Татар-информ»). Татарстан Президенты Рөстәм Миңнеханов 24 гыйнварда “2012 елны Татарстан Республикасында Тарихи-мәдәни мирас елы дип игълан итү турында”гы Указга кул куйды, дип хәбәр итә ТР Президентының матбугат хезмәте.
Указ текстында болай диелә:
“Җәмәгатьчелек игътибарын Татарстан Республикасы территориясендә яшәүче халыкларның тарихи һәм рухи традицияләрен, мәдәниятләрен һәм телләрен саклау һәм үстерү, мәдәни мирас объектларын яңадан торгызу, реставрацияләү һәм популярлаштыруда ярдәм күрсәтү мәсьәләләренә җәлеп итү максатыннан карар чыгарам:
1. 2012 елны Татарстан Республикасында Тарихи-мәдәни мирас елы дип игълан итәргә.
2. Татарстан Республикасы Министрлар Кабинетына бер ай вакыт эчендә үткәрү вакытын, җаваплы башкаручыларны, финанслау күләмнәрен һәм чыганакларын күрсәтеп, 2012 елда Татарстан Республикасында Тарихи-мәдәни мирас елын уздыру буенча төп чаралар планын эшләргә һәм расларга, шулай ук аның гамәлгә ашырылуын контрольдә тотарга.
3. Татарстан Республикасы муниципаль районнары һәм шәһәр округлары башлыкларына, Татарстан Республикасында федераль башкарма хакимият органнарының территориаль органнарына, иҗтимагый берләшмәләр һәм оешмаларга Татарстан Республикасында Тарихи-мәдәни мирас елын әзерләү һәм үткәрүдә актив катнашырга.
4. “Татмедиа” Республика матбугат һәм гаммәви коммуникацияләр агентлыгына, “Яңа гасыр” телерадиокомпаниясе” ААҖнә, республика һәм җирле гаммәви мәгълүмат чараларына Татарстан Республикасында Тарихи-мәдәни мирас елында үткәреләчәк чараларны киң яктыртуны тәэмин итәргә.
5. Указ басылып чыккан көненнән үз көченә керә”.