Чара Казанда 21-22 май көннәрендә узачак

(Казан, 26 гыйнвар, “Татар-информ”). Казанда Ислам бизнесы һәм финанслары буенча халыкара саммит быел 21-22 май көннәрендә узачак. Бу хакта ТР Инвестицион үсеш агентлыгының матбугат хезмәте хәбәр итә. Дүртенче тапкыр оештырылучы әлеге халыкара чара Россиянең Ислам хезмәттәшлеге оешмасы илләре белән икътисади багланышларына багышланачак.
“KAZANSUMMIT 2012”не оештыручылар - ТР Инвестицион үсеш агентлыгы белән Ислам бизнесын һәм финансларын үстерү буенча коммерцияле булмаган оешма.
Агентлыктан хәбәр итүләренчә, быелгы саммит узганнарыннан тагын да дәрәҗәлерәк булуы, чакырылган кунакларның күплеге белән аерылып торачак. Ул халыкара инвесторларны, Россия һәм чит илләрнең хакимият вәкилләрен, финанс структуралары җитәкчеләрен, эшмәкәрләр һәм эшлекле элитаны, Россия, Ислам хезмәттәшлеге оешмасы, БДБ, Ауропа, Азия илләреннән экспертлар һәм галимнәрне бер мәйданга җыячак.
“KAZANSUMMIT 2012” кысаларында “KAZANHALAL 2012” традицион халыкара-күргәзмә ярминкәсе дә узачак. Быел анда Россия төбәкләреннән һәм чит илләрдән 150 дән артык экспонент-компания катнашыр дип көтелә.