Яклар 2013 елгы Универсиадага әзерлек кысаларында хезмәттәшлек итү мәсьәләләре хакында фикер алышты

(Казан, 26 гыйнвар, «Татар-информ»). Бүген Татарстан Республикасы Президенты Рөстәм Миңнеханов «ПрайсвотерхаусКуперс» («PricewaterhouseCoopers» – «PwC») халыкара фирмалар челтәре җитәкчелеге белән очрашты.
Очрашу Давостагы (Швейцария) Бөтендөнья икътисади форумы кысаларында узды, дип хәбәр итә ТР Президентының матбугат хезмәте.
Очрашуда яклар «ПрайсвотерхаусКуперс» компаниясенең Татарстан Республикасындагы эшчәнлеге нәтиҗәләре, шул исәптән 2013 елгы Бөтендөнья җәйге Универсиадасына әзерлек кысаларындагы партнерлык, республика икътисадына чит ил инвестицияләрен җәлеп итү өлкәсендәге хезмәттәшлек, шулай ук белем бирү проектларын гамәлгә ашыру буенча Казан (Идел буе) федераль университеты белән хезмәттәшлек мәсьәләләре хакында фикер алышты, дип хәбәр итте ТР Президентының Тышкы элемтәләр департаменты директоры – ТР Президентының халыкара мәсьәләләр буенча ярдәмчесе Искәндәр Мөфлиханов.
Очрашу барышында Рөстәм Миңнеханов һәм «ПрайсвотерхаусКуперс» компаниясе вәкилләре шулай ук белгечләр әзерләү, икътисади стратегияләр эшләү һәм башка өлкәләрдә «PwC» белән Татарстан арасындагы хезмәттәшлекне киңәйтү хакында да фикер алышкан.
Белешмә өчен. «ПрайсвотерхаусКуперс» («PricewaterhouseCoopers» – «PwC») компаниясе Татарстан предприятиеләре белән 1995 елдан бирле эшли. Бүгенге көндә «PwC» хезмәтләреннән «ТАИФ» ААҖ, «Татэнерго», «Казаноргсинтез», «Татнефть», «КАМАЗ», «Таттелеком», «Ак Барс» банкы, «Түбән Кама Нефтехим», «Ак Барс» холдинг компаниясе һәм башкалар файдалана. «PwC» офисы Казанда 2007 елда ачыла, 2011 ел ахырына анда 120 кеше эшләгән.