Аның төп темасы яшьләр сәясәте, патриотик тәрбия, авыл яшьләре тормышына багышланган иде

(Казан, 27 гыйнвар, “Татар-информ”, Роза Исмәгыйлова). Нурлат шәһәренең Мәдәният сараенда узган “Игътибар үзәгендә – яшьләр” дип аталган форумның төп темасы яшьләр сәясәте, патриотик тәрбия, авыл яшьләре тормышы иде, дип хәбәр итә “Дуслык” газетасы.
Бу көнне яшьләр үз проблемалары хакында фикер алышып кына калмадылар, планнары белән дә уртаклаштыр. Чарада катнашкан район башлыгы Наил Шарапов әлеге форумны бик кирәкле чара дип атады.
– Илебезнең киләчәге бүген нинди яшьләр тәрбияләүдән тора. Һәм аларга тормышта үз урыннарын табарга ярдәм итү – безнең бурыч,- диде район башлыгы үз чыгышында.
Форумга актив яшьләр – оешма-предприятиеләрдә яшьләр белән эшләүчеләр, укучылар, студентлар җыелган иде. Алар бу көнне хисап тотып кына калмады, кимчелекләрне дә уртага салып сөйләште. Чарада катнашкан кунак – наркотиклар әйләнешен контрольдә тоту буенча РФ Федераль хезмәтенең республика буенча идарәсе начальнигы урынбасары Илдар Маннапов тулаем республикада наркоманиянең торышы турында бәян итеп, Нурлат районындагы хәлләргә дә тукталды.
- Соңгы ике ел эчендә районда наркоманнар саны 23кә арткан. Бүген 12 кеше хастаханәдә исәптә тора. Районда наркоманнар катнашында 32 җинаять теркәлгән. Барлыгы 9 килограмм наркотик алынган, шуларның 94 проценты - марихуана, - диде И.Маннапов.
Ә яшим, булдырам, шөгыльләнәм дигән яшьләргә районда мөмкинлекләр җитәрлек. Әйтик 19802 кеше, шуларның 7638е - 30га кадәрге яшьләр, бүген спорт белән шөгыльләнә, 180 яшь кеше волонтерлык юлын сайлаган. ТР Дәүләт Советы каршындагы ижтимагый яшьләр Советы әгъзасы Анастасия Исаева Нурлатта яшьләр өчен барлык шартлар тудырылуын аерым билгеләп үтте.