Мамадышта машина җәяүлене бәрдереп үтергән

(Казан, 27 гыйнвар, “Татар-информ”, Миләүшә Низаметдинова). Кичә кичке 9 нчы 20 минутта Мамадышның Заречная урамында “ВАЗ-2109” машинасында барган 18-19 яшьлек егет 50 яшьлек ирне бәрдергән һәм юлдагы шушы очрашу соңгысы өчен фаҗига белән тәмамланган. Ир кешенең машина юлы буйлап каршы як юнәлештә атлаганлыгы билгеле. Алдан чыгарылган нәтиҗәләр буенча, рульдагы егет юл йөрү кагыйдәләренең 10.1 пунктын бозган, ягъни хәрәкәт иминлеген тәэмин итәрлек тизлек сайламаган.

Республика ЮХИДИ идарәсеннән алынган статистика белешмәсе буенча, яңа елның 26 көнендә республикадагы юлларда транспорт һәлакәтләрендә инде 33 кеше һәлак булган, 264е имгәнгән, җәрәхәтләнгән, соңгыларының яртысы диярлек Казан “өлешенә” туры килә һәм башкала юлларында әҗәлен табучылар – әлегә 3әү.