Кунаклар рәсми сәфәрне Универсиада объектлары белән танышудан башлады

(Казан, 27 гыйнвар, “Татар-информ”). Бүген Казанга Гадәттән тыш хәлләр министры генерал-полковник Кәмаледдин Гейдаров җитәкчелегендә Әзербәйҗан Республикасы делегациясе килде. Кунакларны “Казан” халыкара аэропортында ТР Премьер-министры Илдар Халиков, ТР гражданнар оборонасы һәм гадәттән тыш хәлләр министры Рәфис Хәбибуллин каршы алды.
Делегация әгъзалары аэропорттан туры Универсиада авылына юл тотты. Алар биредә Казан студентларының яшәү шартлары белән, 2013 елгы Универсиада объектларындагы өч дәрәҗәле комплекслы иминлек системасы белән дә танышты. Соңрак кунаклар Универсиада өчен әзерләнгән башка объектларда да булды, дип хәбәр итә ТР Гражданнар оборонасы һәм гадәттән тыш хәлләр министрлыгының матбугат хезмәте.
Дәрәҗәле кунаклар 50 метрлы ябык “Буревестник” бассейнын, биредә үк халыкара стандартларга җавап биргән күп функцияле спорт залын, шулай ук Теннис һәм Волейбол үзәкләрен карады.
Рәсми сәфәр программасының көннең икенче яртысына планлаштырылган өлешенә Россия Гадәттән тыш хәлләр министрлыгының ТР идарәсе, ТР Гражданнар оборонасы һәм гадәттән тыш хәлләр министрлыгы биналары комплексы, махсус техника һәм җиһазлар белән танышу, югары технологияләр өлкәсендәге IT-паркта булып, “112” бердәм номеры аша ашыгыч чакыруларны кабул итү системасы проектының ничек гамәлгә ашырылуын күзәтү кертелгән. Программада ТР Гражданнар оборонасы һәм гадәттән тыш хәлләр министрлыгы белән Әзербәйҗанның Гадәттән тыш хәлләр министрлыгы арасында хезмәттәшлек Меморандумын имзалау, “Ак Барс” сараенда тхэквондо буенча Ауропа квалификация турниры ачылышында катнашу каралган. Мәгълүм булганча, Әзербәйҗан Гадәттән тыш хәлләр министры Кәмаледдин Гейдаров -Бөтендөнья тхэквондо федерациясенең вице-президенты.