24,46 гектарда күпкатлы 29 торак йорт төзү планлаштырылган, 7,6 гектар җирдә шәхси торак төзелеше җәелдереләчәк

(Казан, 27 гыйнвар, “Татар-информ”, Роза Исмәгыйлова). Әлмәт шәһәренең “Алсу” микрорайонында быел торак йортлар барлыкка киләчәк. Әлмәт муниципаль районы җитәкчелеге монда йортлар төзүче компанияләрнең берсе белән очрашты, дип хәбәр итә “Әлмәт таңнары” газетасы.
Район башлыгы вазифаларын башкаручы - район башкарма комитеты җитәкчесе Мәҗит Салихов “Алсу” микрорайоны территориясенең 49,9 гектар мәйдан биләвен билгеләп үтте. Шуның 24,46 гектарында күпкатлы 29 торак йорт төзү планлаштырылган. 7,6 гектар җирдә шәхси торак төзелеше җәелдереләчәк. Бу 61 йорт дигән сүз.
Микрорайонда 1266 урынлык мәктәп, 270 урынга балалар бакчасы һәм башка объектлар төзү дә каралган.
- Кирәкле барлык инженерлык челтәрләре төзелде, йортлар төзелеше башланды. Микрорайонда берничә инвестор эшли. Чиләбе торба-прокат заводы узган ел ук эшне башлады. Алар тугыз катлы ике йорт төзи. "Торак инвестиция компаниясе" ҖЧҖ дә ("ЖИК") "Алсу"га зур проект белән керә" , - диде Мәҗит Хаҗипович.