“Татар-информ” мәгълүмат агентлыгы “Тавыш тизлегендәге фикер” номинациясендә билгеләп үтелде

(Казан, 28 гыйнвар, "Татар-информ", Люция Камалова). Кичә Татарстан мәдәният министры Айрат Сибагатуллин С.Сәйдәшев исемендәге Дәүләт Зур концерт залының актлар залында мәдәният темасын яктыртучы журналистлар белән очрашты. Ул гаммәви мәгълүмат чаралары вәкилләрен узган бәйрәмнәр белән котлады һәм аларның узган елда башкарган эшен билгеләп үтте.
Үз чыгышында ул узган елның Тукай елы булуын искәртте. Әлеге дата кысаларында Татарстанда гына түгел, дөньяның төрле почмакларында тантаналы чаралар узды, яңа һәйкәлләр ачылды, иҗади очрашулар, конференцияләр һәм башка чаралар үткәрелде. Быел да мәдәният өлкәсендә төрле киң колачлы чаралар уздырылыр дип көтелә, Тукайга тагын бер һәйкәл ачылачак.
Шуннан соң Татарстан мәдәният министры журналистларга дипломнар һәм истәлекле бүләкләр тапшырды. “Татар-информ” мәгълүмат агентлыгы, иң оператив эшләүче басмаларның берсе буларак, “Тавыш тизлегендәге фикер” номинациясендә билгеләп үтелде.