ҺАВА ТОРЫШЫ +13 oC

Яңалыклар

барлык хәбәрләр Татарстан Россия
МӨҺим
Чирмешән мәктәпләре укучылары 85 тонна макулатура, 7 тонна пластик савыт-саба җыйган
Яңа Чишмә районы хуҗалыкларында савым арта
Менделеевскида чыгарылыш балы датасы билгеле
Лениногорскида “Трактор-тагылма” операциясе башланды
17 июньнең төп вакыйгалары - фото һәм сылтамалар

Җәмгыять

Лениногорскиның күпбалалы гаиләләренә торак сертификаты тапшырылды

20 февраль 2018, 03:00

Лениногорскиның күпбалалы гаиләләренә торак сертификаты тапшырылды Чиратта тагын 21 гаилә тора.

(Лениногорск, 20 февраль , “Татар-информ”, “Заман сулышы”). Лениногорск шәһәре һәм  районда яшәүче күпбалалы ике гаилә өчен шатлыклы мизгелләр булды: аларга тантаналы төстә торак алу өчен сертификат тапшырылды, дип хәбәр итә район газетасы.

Бүгенге заманда гаиләдә күп бала тәрбияләп, аларны аякка бастыру өчен ата-анадан көч тә, финанс мөмкинлекләре дә таләп ителә. Әле ярый, дәүләт тә ярдәм кулы суза. Хәзерге вакытта биш һәм аннан күбрәк бала тәрбияләүче гаиләләр торак шартларын яхшырта алалар, шәһәр һәм районда яшәүче, торак фондында чиратта булган гаиләләр сертификат алу мөмкинлегенә ия.

Әнә Урмышлыда яшәүче Камил белән Сиринә Фәйзрахмановлар гаиләсендә биш бала, олысына – 27, кечкенәсенә 10 яшь икән. Иске генә йортта яшиләр. “Җылы су юк. Өй эченә салкын су кермәгән, урамнан алып керәбез”, ди алар. Сертификатны зур ярдәм дип саныйлар, аны ничек кулланырга икәнен хәл итмәгәннәр, әле биш баланың берсе дә гаиләле түгел бит, уйлашырбыз, ди алар.

Мисхәт белән Гөлчихрә Алтынбаевлар сертификат алуларына ышанып та бетә алмыйлар.

- Кичә генә хәбәр иттеләр. Ышанырга да, ышанмаска да белмибез. Дулкынлану да, шатлану да бар. Алты бала: дүрт малай, ике кызыбыз, зурысына 27, кечкенәсенә 13 яшь. Зал һәм аш бүлмәсе генә булган өйдә гомер итәбез. Коммуникацияләрне үзебез үткәрдек. Уңайлыклар йортта инде. Кухняга да диван куеп, ике бүлмәгә бүленеп йоклыйбыз, шулай җайладык .Торак фондында 10 еллап чиратта тордык, - дип сөйли әниләре.

Район башкарма комитеты җитәкчесе Наил Залаков сертификатларны тапшырганда, бала тәрбияләүләре өчен рәхмәтен әйтте, булачак торакта шатлык-бәхет белән яшәүләрен теләде. Торак фонды буенча белгеч Елена Романеева әйтүенчә, гаиләләр әлеге сертификатта күрсәтелгән суммага икенчел торактан фатирлар тәкъдим ителәчәк.

Сертификатлар Татарстан Министрлар Кабинетының “Торак шартларын яхшыртуга мохтаҗ булган күпбалалы гаиләләрне торак белән тәэмин итү буенча өстәмә чаралар турында” карары нигезендә бирелә. Программа 2007 елдан бирле гамәлдә. Безнең муниципаль районда программа эшли башлаганнан соң ун гаилә торак шартларын яхшырткан. Чиратта тагын 21 гаилә тора, диелгән район хәбәрендә.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10