ҺАВА ТОРЫШЫ -5 oC

Яңалыклар

барлык хәбәрләр Татарстан Россия

Авыл

Россиядә беренче мобиль ветеринария пункты Татарстанда эшли башлады

14 март 2018, 16:18 , Фото: Салават Камалетдинов

Россиядә беренче мобиль ветеринария пункты Татарстанда эшли башлады Пункт мал-туар тоякларын эшкәртү, дәвалау станок-беркеткече, вак йорт хайваннары өчен клиника, йогышсызландыру җайланмасы һ.б. белән җиһазландырылган.

(Казан, 14 март, “Татар-информ”, Чулпан Шакирова). Россиядә беренче мобиль ветеринария пункты Татарстанда эшли башлады. Бу турыда бүген, Татарстан Президенты Рөстәм Миңнеханов ветеринария идарәсе, нәсел эше һәм кулланучылар кооперациясе оешмаларына автомобиль ачкычлары тапшыру чарасында билгеле булды.

Татарстан республикасының Министрлар Кабинеты каршындагы Баш ветеринария идарәсенә караган район һәм республика ветеринар берләшмәләренә УАЗ базасында прицеплы 48 авто шасси бирелде.

“Мобиль ветеринария пункты булдыру - участок ветеринария пунктлары төзү турындагы Президент программасының дәвамы. Без моңа кадәр 126 стационар ветеринария пунктлары төзегән булсак, быелдан алар барлык инструментларын үз эченә алган мобиль пунктларга әйләнде. Мал табибларына әлеге мобиль пунктлар теләсә кая барып, булсын ул шәхси хуҗалык яки крестьян-фермер хуҗалыгы, ветеринария ярдәме күрсәтү мөмкинлеге бирә. Бу - беренче тәҗрибә. Беренче коймакны төерле була, диләр. Без аны берничә тапкыр киңәшләшеп, уйлашып үзгәрттек. Шулай да әлеге комплекс уңышлы килеп чыкты. Бу - Россиядә беренче мобиль ветеринария пунктлары”, - диде Алмаз Хисаметдинов “Татар-информ” хәбәрчесенә.

Мобиль ветеринария пунктлары мал-туарның тоякларын эшкәртү һәм дәвалау станок-беркеткече, вак йорт хайваннары өчен клиника, йогышсызландыру җайланмасы һәм авыл җирендә малларга беренче ярдәм күрсәтә алырлык башка кораллар белән җиһазландырылган. Авто шасси хайваннарның инфекцияле авырулары булган табигый учакларына эпизоотиягә каршы отряд белән бергә керү мөмкинлеге бирә.

“Әлеге күчеп йөри торган ветеринария пунктлары малларның сәламәтлеген кайгырту белән бергә, вакытында ярдәм күрсәтеп, кешеләрне бәла-казадан саклау мөмкинлеге дә бирә”, - диде Алмаз Хисаметдинов.

Билгеле булганча, Татарстанда 232 ветеринария пункты бар. Шуның 126сы махсус программа нигезендә, соңгы өч ел эчендә төзелгән. Аларда 549 мал табибы эшли.

Алмаз Хисаметдинов “Татар-информ”га авылларга барып хезмәт күрсәтү өчен мобиль ветеринария пунктлары кайтачагын Әлки районында баш мал табибларының семинар-киңәшмәсе вакытында ук әйткән иде.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10