ҺАВА ТОРЫШЫ +23 oC

Яңалыклар

барлык хәбәрләр Татарстан Россия

Мәдәният

Түбән Кама театры “Анам кыры” спектаклен Тукай премиясе комиссиясенә күрсәтте

16 март 2018, 08:56 , Фото: Рамиль Гали

Түбән Кама театры “Анам кыры” спектаклен Тукай премиясе комиссиясенә күрсәтте Дәүләт премиясенә спектакльнең режиссеры Рөстәм Галиев, рәссамы Булат Нәсыйхов һәм Тулганай ролен башкаручы Гүзәл Шәмәрданова тәкъдим ителгән.

(Казан, 16 март, "Татар-информ", Рузилә Мөхәммәтова). Кичә Габдулла Тукай исемендәге Дәүләт премияләре буенча комиссия әгъзалары Түбән Кама татар дәүләт драма театрының “Анам кыры” спектаклен карадылар. 2015 елда куелган сәхнә әсәре быел Габдулла Тукай исемендәге дәүләт премиясенә дәгъва итә. Премиягә спектакльнең режиссеры Рөстәм Галиев, рәссамы Булат Нәсыйхов һәм Тулганай ролен башкаручы Гүзәл Шәмәрданова тәкъдим ителә.

Искәртеп үтәбез, Түбән Кама театрының традицион Казан гастрольләре 13-16 март көннәрендә Камал театры сәхнәсендә бара. Театр Казанга алты спектакль алып килгән.

Спектакль "Анам кыры" ("Материнское поле") Нижнекамского государственного театра

“Анам кыры” спектакле кичә ике мәртәбә театрның Кече залында күрсәтелде. Сатуда билетлар беткән иде. 160 урынлык Кече зал бөтен теләге булганнарны сыйдыра алмады. Оештыручылар билгеләп үткәнчә, “Анам кыры” - театр алып килгән спектакльләр арасында иң күп билетлар сатылган спектакль.

Чыңгыз Айтматовның “Анам кыры” әсәре буенча куелган спектакльнең жанры драматик повесть дип билгеләнгән. Спектакльнең програмкасында билгеләп үтелгәнчә, “Татар кызы Нәгыймә белән кыргыз егете Төрекулның бөек улы Чыңгыз Айтматовның даһи әсәрендә дөньяның бар аналарына мәдхия җырлый, яшәешнең нигезендә яткан олуг мәхәббәтне данлый”.

Спектакль "Анам кыры" ("Материнское поле") Нижнекамского государственного театра

Спектакль 1 сәгать 10 минут бара.

Театр бу спектакле белән Казахстан һәм Кыргызстан республикаларында халыкара фестивальләрдә катнашып лаеклы бәясен алган. Тулганай ролен башкарган Гүзәл Шәмәрданова 2016 елда “Иң яхшы хатын-кыз” роле номинациясендә “Тантана” милли театр премиясенә ия булган иде.

Спектакль "Анам кыры" ("Материнское поле") Нижнекамского государственного театра

Спектакльне Татарстан Дәүләт Советы депутаты, халык шагыйре Разил Вәлиев, Татарстан Президентының эчке сәясәт мәсьәләләре буенча департаментының милли сәясәтне тормышка ашыру идарәсе җитәкчесе Данил Мостафин, Татарстан Республикасы Фәннәр академиясенең вице-президенты. Татарстан Республикасы Фәннәр академиясе хакыйкый әгъзасы Дания Заһидуллина, Татарстан мәдәният министрының беренче урынбасары Эльвира Камалова, Татарстан рәссамнары берлеге рәисе Зөфәр Гыймаев, Татарстан Мәдәният министры карамагындагы Иҗтимагый совет рәисе Марсель Таишев, Татарстан театр әһелләре берлеге рәисе, Камал театрының баш режиссеры Фәрит Бикчәнтәев һәм Татарстан язучылар берлеге рәисе Данил Салихов карады. Алар әлегә тамаша турында үз фикерләрен әйтмәде. Аларның фикере ябык ишекләр артындагы комиссия утырышында яңгыраячак.

Спектакльне шулай ук әдәбият белгече Миләүшә Хәбетдинова да карады.

Спектакль "Анам кыры" ("Материнское поле") Нижнекамского государственного театра

Искәртеп үтәбез, театр Чыңгыз Айтматов иҗатын һәм шәхесен пропагандалау эшен дәвам итәргә җыена. Киләсе театр сезонында коллектив Ркаил Зәйдулланың “Нәгыймә” пьесасын сәхнәләштерергә уйлый. Пьеса Чыңгыз Айтматовның әнисенә багышланган.
 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10