ҺАВА ТОРЫШЫ +10 oC

Яңалыклар

барлык хәбәрләр Татарстан Россия
×

Җәмгыять

Әлмәттә "Кошларны ашатыгыз" акциясе бара

16 март 2018, 11:39 , Фото: eco.tatarstan.ru

Әлмәттә Чара елның салкын чорында кошларга ярдәм итү, бакчага йөрүче балаларда һәм мәктәп укучыларында табигатькә сакчыл мөнәсәбәт формалаштыру өчен оештырыла

(Казан, 16 март, "Татар-информ"). "Кошларны ашатыгыз-2018" табигатьне саклау акциясе Татарстан Республикасы Экология һәм табигый ресурслар министрлыгының Көньяк-Көнчыгыш территориаль идарәсе һәм Әлмәт районының Экология һәм табигатьтән файдалану департаменты тарафыннан оештырылган. Шушы чара кысаларында Әлмәт шәһәренең "Золушка" исемле 46 нчы балалар бакчасында җимлекләр әзерләү буенча мастер-класс булган. Бу турыда Татарстан Экология һәм табигый байлыклар министрлыгы матбугат хезмәте хәбәр итте.

"Тәрбиячеләр һәм ата-аналар җитәкчелегендә бакчага йөрүче балалар канатлы дуслар өчен җимлек ясарга өйрәнде, кошларның нинди ризык белән туклануы хакында белде. Гамәли чара барышында балалар үзләренә мәгълүм булган кошлар турында сөйләде, соңыннан мөстәкыйль рәвештә аларга рацион төзеде. Тәкъдим ителгән продуктлар арасыннан чыпчыклар, күгәрченнәр, песнәкләр, карабүрекләр яратып ашый торган ризыкларны сайлады. Әзер азык салынган җимлекләрне мөгаллимнәр, балалар һәм ата-аналар белән берлектә, балалар бакчасында һәм янәшә урнашкан паркта элеп чыкты", диелгән әлеге хәбәрдә.

Чараның максаты – елның салкын чорында кошларга ярдәм итү, бакчага йөрүче балаларда һәм мәктәп укучыларында табигатькә карата сакчыл мөнәсәбәт формалаштыру.

Каурыйлы дусларга ярдәм акциясе 26 мартка кадәр дәвам итәчәк. 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10