ҺАВА ТОРЫШЫ +18 oC

Яңалыклар

барлык хәбәрләр Татарстан Россия

Авыл

Чирмешән районының Яңа Элмәле авылында сөтне токымлы ат белән җыялар

22 март 2018, 03:00 , Фото: Гөлсирә Шәрифуллина

Чирмешән районының Яңа Элмәле авылында сөтне токымлы ат белән җыялар Сөт җыючы утызлап йортны әйләнеп чыга.

 (Чирмешән, 22 март, “Татар-информ“, “Безнең Чирмешән“, Гөлсирә Шәрифуллина). Чирмешән районының Яңа Элмәледә сөтне токымлы ат белән җыялар. Бу авылда яшәүче Анна Мадикова иртә таңнан атын җигеп, авыл буйлап сөт җыярга чыгып китә, дип яза җирле басма.

-Аня, яшь булуына карамастан, бик тырыш, эшен җиренә җиткереп башкара, - ди Яңа Элмәле авыл җирлеге башлыгы Борис Портнов. -Аңа карата дәгъва белдерүче юк.

Сөт җыючы утызлап йортны әйләнеп чыга. Бүген авылда 110 баш сыер исәпләнә. Кайбер хуҗалар 10 башка кадәр сыер асрый. Әйтик, шул ук авыл җирлеге башлыгының 8 баш сыеры бар, ул көн саен уртача 60 килограмм сөт тапшыра. Андрей Митюков һәм Юрий Ильмендеев гаиләләре дә көн саен шул чама сөт сата. Сөт өчен исәп-хисапны да ай саен ясап баралар.

-Миңа бу эш ошый. Бер авырлыгы да юк, -ди Аня.- Иртән атымны җигәм дә, авыл буйлап чыгып йөреп кайтам. Бу атым өчен дә файдага гына.

Аняның Актавия кушаматлы аты – гади генә түгел, ә токымлы - Орлов юртагы . Ул аның белән ат чабышларында да катнаша. Гомумән, авыл кызы бала чактан ук атларга гашыйк кеше. Әтисе колхозда ат караучы булган, кызда яшьтән үк атларга хөрмәт уяткан. Аня инде берничә ел атларны Сабан туе ярышларына үзе хәзерли. Актавия белән сөт кенә җыймый, атланып та йөреп кайта.

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10