ҺАВА ТОРЫШЫ +24 oC

Яңалыклар

барлык хәбәрләр Татарстан Россия
МӨҺим
Ык елгасында баткан ир-ат мәетен Минзәлә коткаручылары өч көн эзләгән
Изге Болгар җыенына бару өчен һәрбер мөхтәсибәткә автобус биреләчәк
Мөселман балалар Сабан туенда баш батырны, көрәштермичә, жирәбәдә ачыкладылар
Мәскәүдән Эльза Габдрахманова Казанда узачак "Татар кызы" конкурсында катнашырга әзерләнә
Алмаз Хәмзин: Кадим Нуруллинны циркка җибәрәләр дигәч, шаккатык - "Шәһри Казан" газетасы

Авыл

Мөслимдә зона семинар-киңәшмә узды

17 апрель 2018, 06:00

Киңәшмәгә республиканың көнчыгыш зонасыннан унбиш районның авыл хуҗалыгы берләшмәләре җитәкчеләре һәм белгечләре чакырылган.

(Мөслим, 17 апрель, "Татар-информ", "Авыл утлары", Әлфинур Ногманова). Бу көннәрдә республика районнарында “Язгы кыр эшләрен үткәрдә алдынгы технологияләр куллану” дигән темага багышланган зона семинар-киңәшмәләре бара. Аның чираттагысы Мөслимдә үтте. Семинар-киңәшмә эшендә ТР авыл хуҗалыгы һәм азык-төлек министры урынбасары Илдус Габдрахманов, министрлык белгечләре, “Россия авыл хуҗалыгы үзәге”, “Татарстанның элиталы орлыклары”, “Агрохимсервис-Казан”, “Биопрепаратлар” һәм “Сервис Агро” фәнни-җитештерү үзәге, башка предприятиеләр вәкилләре катнашты, дип яза җирле басма.

Киңәшмәгә республиканың көнчыгыш зонасыннан унбиш районның авыл хуҗалыгы берләшмәләре җитәкчеләре һәм белгечләре чакырылган.

Ничек кенә булмасын ел елга ошамый. Авыл хуҗалыгы тармагы өчен дә стандарт ел юк. Быел да календарь яз шактый соңга калып килә. Бу игенчеләрдән агрочаларны мөмкин кадәр кыска срокта үткәрүне таләп итәчәк. Өстәвенә узган ел икмәк бәяләренең түбән булуы, соңгы айларда сөткә хакның кискен төшүе аграрийларны катлаулы икътисадый хәлдә калдырды. Хәтта аграрийлар арасында ситуациядә чыгу өчен чәчүлек мәйданнарны киметү юлы белән чыгарга теләүчеләр дә бар икән.

– Чәчүлек мәйданнарын киметү – ялгыш юл. Үзең утырган ботакка үзең балта белән чабуга тиң бу. Без моңа барырга тиеш түгел. Республика хөкүмәте авыл хуҗалыгы товар җитештерүчеләрен ярдәменнән ташламады. Көзге чәчү өчен минераль ашламаларга гына да республика буджетыннан районнарга барлыгы 1 млрд сум күләмендә финанс ярдәме күрсәтелгән иде. Моннан тыш агымдагы елның гыйнвар-февраль айларында хуҗалыклар Федераль һәм республика бюджетыннан шактый ярдәм алды. Шушы атна ахырына сөрүлек җирләрнең һәр гектарына уртача 600 сум исәбеннән өстәмә ярдәм киләчәк, – диде ТР авыл хуҗалыгы һәм азык-төлек министры урынбасары Илдус Габдрахманов.

Әлеге ярдәм республика буенча 1 млрд 800 млн сум тәшкил итә. Мөһим кампания алдыннан зона киңәшмәләре үткәреп, катлаулы икътисадый шартларда игенчелектә аз чыгымнар кулланып, тармакның экономик нәтиҗәлелеген арттыру юлларын күрсәтү дә ярдәмнең бер төре дип карарга кирәктер. Сер түгел, һәр тармактагы кебек игенчелектә дә традицион технологияләрдән китә алмаучылар, искелеккә ябышып ятып, үз казаннарында гына кайнаучылар шактый. Ә заман башканы таләп итә. Җирнең уңдырышлылыгын арттырыйм дисәң дә, игеннәрне авырулардан һәм корткычлардан саклыйм дисәң дә, фәнгә мөрәҗәгать итәргә, яңа технологияләргә йөз белән борылырга, белгечләр сүзен тыңларга кирәк. Бу семинарда да бик күп яңалык алды алар. Чәчүлек материалның фитопатологик торышын яхшыртуга, орлыкларның тишелешен арттыруга тәэсир итүче чаралар, микроашламалар куллану бәрабәренә рентабельлелекне арттыру юллары турында мәгълүматлар бирелде. Орлык өчен рапс, кукуруз, көнбагыш үстерүдә кулланылучы прогрессив алымнар, игенчелектә биологияләштерү мәсьәләләре дә уртага салып сөйләшенде. Шунысын игътибарга лаек: чыгыш ясаучылар барлык яңалыкларны да игенчелектә алдынгы алымнарны актив кулланучы хуҗалыкларның эш тәҗрибәсендә күрсәтте. Башкаларны да үзләре белән хезмәттәшлек итәргә чакырды.

– Мондый семинарлар бик кирәк. Агрономнар да, җитәкчеләр дәкүп нәрсә алып китәбез. Бүген фәннән башка уңышны көйләп булмаганын аңларга кирәк, – “Исламов” крестьян-фермер хуҗалыгы җитәкчесе Илгиз Исламов.
 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10