ҺАВА ТОРЫШЫ +10 oC

Яңалыклар

барлык хәбәрләр Татарстан Россия

Җәмгыять

Татарстанда табиблар үгез сөзгән ир-атның гомерен саклап калган

10 июль 2018, 20:46 , Фото: РКБ

Татарстанда табиблар үгез сөзгән ир-атның гомерен саклап калган Пациентны Апас үзәк район хастаханәсеннән санавиция вертолетында Казанга алып килгәннәр.

(Казан, 10 июль, “Татар-информ”, Валерия Белова). Республика клиник хастаханәсе табиблары Апас районында үгез сөзгән ир-атка операция ясаганнар һәм гомерен саклап калганнар.

Апаста яшәүче 38 яшьлек Илсур Мөхәммәтҗанов берничә ел терлек озатып, күчереп йөртү белән шөгыльләнә. Чираттагы заказын ул 22 июньдә алган. Терлекне район фермасыннан Башкортстанга илтергә кирәк булган.

“Терлекне машинага менгергәч, бәйләп куйыйм. дидем. Машина арбасына менгәч, үгез сөзә башлады. Аякларга, аннан муенга эләктерде. Кан китте. Мин кычкырдым да сикереп төштем”, - дп сөйләде “Татар-информ”га Илсур Мөхәммәтҗанов.

Аннан соң нәрсә булганын ир-ат хәтерләми, ул шунда ук диярлек аңын югалткан. Хатыны "Ашыгыч ярдәм" машинасын чакырткан. Табиблар ир-атны район хастаханәсенә алып киткәннәр. Республика клиник хастаханәсе табиблары санавиция вертолетында районга очкан.

“Бәхетле кеше. Үгез аның кан тамырларын эләктермәгән, алар зарарланмаган. Могҗиза бу, дияргә була. Трахея бөтенләй диярлек өзелгән иде”, - диде Республика клиник хастаханәсе хирургия торакаль бүлеге җитәкчесе Валерий Матвеев.

Табиблар, ир-атны Казанга 23 июньгә каршы төндә алып килеп, операция ясаганнар. “Ярада куркыныч инфекция бар иде. Антибактериаль терапия үткәрдек. Татарстанда шушындый ашыгыч операция ясаганны мин хәтерләмим. Операция ясау да, тернәкләндерү дә авыр булды. Биредә бөтен коллективның хезмәте кирәк булды. Без барысын да башкарып чыга алдык”, - диде Валерий Матвеев.

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10