ҺАВА ТОРЫШЫ +10 oC

Яңалыклар

барлык хәбәрләр Татарстан Россия

Рәсми Татарстан

Татарстан Республикасы белән Чжэцзян провинциясе хезмәттәшлек турында килешү имзалады

12 сентябрь 2018, 13:47 , Фото: tatarstan.ru

Татарстан Республикасы белән Чжэцзян провинциясе хезмәттәшлек турында килешү имзалады Бүген Татарстан Республикасы Президенты Кытайның өч провинциясе - Сычуань, Чжэцзян, Шаньдун җитәкчелеге белән очрашты.

(Казан, 12 сентябрь, «Татар-информ»). Бүген Татарстан Республикасы Президенты Рөстәм Миңнеханов Көнчыгыш икътисади форумы-2018 киңлекләрендә Кытайның өч провинциясе - Сычуань, Чжэцзян, Шаньдун җитәкчелеге белән очрашты. Бу турыда республика җитәкчесе матбугат хезмәте хәбәр итте.

Кытай Коммунистлар партиясенең Сычуань провинциясе партия комитеты секретаре Пэн Цинхуа әфәнде белән очрашуда Татарстан Президенты әйтеп үткәнчә, Сычуань – көньяк-көнбатыш Кытайның алга киткән сәнәгать үзәге. Монда автомобильләр төзелеше, металлургия, төзелеш, медицина һәм фармацевтика, гидроэнергетика, текстиль сәнәгать һәм башка тармаклар алга киткән.

Рөстәм Миңнеханов хәбәр иткәнчә, Татарстан белән Сычуань провинциясе арасында хезмәттәшлек турында берничә документ имзаланган. Казанда Кытай Генераль консуллыгы ачылган. ТР Президенты белдергәнчә, Татарстан Республикасы белән Сычуань провинциясенең хезмәттәшлек өчен яхшы перспективалары бар. «Күп кенә Кытай компанияләре Татарстанда уңышлы эшлиләр. Сычуань провинциясенең эшлекле даирәләре безнең базарда үз урыннарын табар дип ышанабыз», - диде Рөстәм Миңнеханов.

Визит делегации Республики Татарстан во главе с Президентом Республики Татарстан Р.Н. Миннихановым в г. Владивосток для участия в IV Восточном экономическом форуме

Очрашудан соң Татарстан Республикасы Президенты һәм Пэн Цинхуа әфәнде барында Татарстан Республикасы Сәламәтлек саклау министрлыгының «Балалар республика клиника сырхауханәсе» ДАСУ белән Сычуань провинциясенең Кытай һәм Европа медицинасы клиникасы арасында хезмәттәшлек турында килешү имзаланды.

Аннары Рөстәм Миңнеханов Шаньдун провинциясе парткомы секретаре Лю Цзяй әфәнде белән очрашты. ТР Президенты билгеләп үткәнчә, Шаньдун КХРның Татарстан белән хезмәттәшлек турында килешү төзегән беренче провинциясе булды (2008 ел). Рөстәм Миңнеханов сүзләренчә, «Хайер» корпорациясе белән багланышлар продуктив хезмәттәшлек үрнәге булып тора, ул Татарстанда суыткычлар чыгару заводы ачты һәм кер юу машиналары һәм аш бүлмәсе өчен җайланмалар заводларын төзү эшен алып бара. Моннан тыш, «КАМАЗ» компаниясе белән Кытайның «Вейчай» компаниясе арасында автомобильләр двигательләре җитештерү өлкәсендә хезмәттәшлек актив үсә. «Барлык бу мисаллар икътисади мөнәсәбәтләрнең тыгыз булуын раслый», - диде Рөстәм Миңнеханов.

КПКнең Чжэцзян провинциясе комитеты секретаре Че Джун әфәнде белән очрашу барышында Рөстәм Миңнеханов быел май аенда үзенең бу провинциягә эш сәфәрен искә төшерде. «Без продуктив очрашулар һәм бизнес-форум уздырдык, эре компанияләрдә – „Алибаба“ һәм „Хиквижин“да булдык», - диде ул.

Визит делегации Республики Татарстан во главе с Президентом Республики Татарстан Р.Н. Миннихановым в г. Владивосток для участия в IV Восточном экономическом форуме

Татарстан Президенты билгеләп үткәнчә, Чжэцзян – Кытайның чит илләр инвестицияләрен җәлеп итү буенча алга киткән провинцияләрнең берсе. «Сездә химия сәнәгате, югары технологияләр өлкәсе, электрон коммерция, авыл хуҗалыгы алга киткән», - диде Рөстәм Миңнеханов.

Очрашу азагында Рөстәм Миңнеханов һәм Че Джун Татарстан Республикасы Хөкүмәте белән Чжэцзян провинциясе Хөкүмәте арасында сәүдә-икътисади, фәнни-техник, социаль һәм мәдәни-гуманитар хезмәттәшлек турында килешү имзаладылар.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10