ҺАВА ТОРЫШЫ +19 oC

Яңалыклар

барлык хәбәрләр Татарстан Россия

Хәвеф-хәтәр

Прокуратура Балтач районында Шушмага агып төшә торган пычрак суларны чистарттыруга ирешкән

19 апрель 2019, 12:26

Компания пычрак суларны норматив нигезендә чистартуны тәэмин итү өчен 250 мең сум акча бүлеп биргән.

(Казан, 19 апрель, «Татар-информ»). Прокуратура «Балтач торак-коммуналь хуҗалыгы күптармаклы җитештерү предприятиесе» акционерлык җәмгыятен Шушма елгасына агып төшә торган пычрак суларны чистарттыруга ирешкән. Бу хакта «Татар-информ» агентлыгына Казан районара табигатьне саклау прокуратурасыннан хәбәр иттеләр.

«Республиканың Балтач районында су белән тәэмин итү белән шөгыльләнә торган «Балтач торак-коммуналь хуҗалыгы күптармаклы җитештерү предприятиесе» акционерлык җәмгыятенең җитештерү эшчәнлеге барышында Шушма елгасына пычратучы матдәләр концентрациясе тиешле нормативтан артыграк булган су агызуы ачыкланды. Предприятиенең закон тарафыннан каралган экологик документлары юк», - дип искәрттеләр күзәтчелек ведомствосында.

Предприятиенең җаваплы вазифаи заты моның өчен «Су объектларын саклау кагыйдәләрен бозу» һәм «Судан файдалану кагыйдәләрен бозу» маддәләре буенча административ җаваплылыкка тартылган.

Прокуратура шулай ук табигатьне саклау законы үтәлешен тәэмин итү таләбе белән судка мөрәҗәгать иткән. Суд прокуратураның таләбен тулысынча канәгатьләндергән, шуннан соң оешма пычрак суларны норматив нигезендә чистартуны тәэмин итү өчен 250 мең сум акча бүлеп биргән.


 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10