ҺАВА ТОРЫШЫ +10 oC

Яңалыклар

барлык хәбәрләр Татарстан Россия

Мәдәният

Рәшит Кәлимуллин Әлмәт көллиятен милли музыка сәнгатенең үсеш базасы итеп күрә

22 май 2019, 17:26 , Фото: gossov.tatarstan.ru

Рәшит Кәлимуллин Әлмәт көллиятен милли музыка сәнгатенең үсеш базасы итеп күрә Татарстан Республикасында музыка сәнгате үсеше буенча концепция әзерләнде.

(Казан, 22 май, “Татар-информ”, Рузилә Мөхәммәтова). ТР һәм РФ Композиторлар берлеге рәисе Рәшит Кәлимуллин Татарстан Республикасында музыка сәнгате үсеше буенча бер музыка көллиятен база итеп билгеләргә тәкъдим итте. Бу хакта ул ТР Дәүләт Советында үткәрелгән матбугат конференциясендә әйтте.

Рәшит Кәлимуллин база уку йорты буларак Әлмәт музыка көллиятен күрә. “Ни өчен Әлмәтме? Чөнки Башкортстанга якынрак. Ә анда этник музыка мәсьәләсендә эшләр яхшырак тора. Без Мәскәүгә якынрак булганга күрә Европалашуга күбрәк бирешкәнбез. Башкортстанда милли музыка уен кораллары ясыйлар, милли уен кораллары оркестрлары бар. Әлмәт Башкортстанга якынрак булганга күрә, аларның педагоглары килеп консультацияләр үткәрә алыр иде”.

Рәшит Кәлимуллин Әлмәттә Казан дәүләт консерваториясе филиалын ачуны да мөмкин хәл дип саный. Әлмәт факультетын ул милли уен коралларын өйрәнү юнәлешендә эш итәр дип күзаллый. “Әлмәт шәһәре музыка мәктәпләре һәм югары уку йортлары өчен кадрлар булдыру урынына әверелер иде”, - дип хыяллана композитор.

Ул төрки илләр композиторларының, музыка белгечләренең Татарстанга методик ярдәм күрсәтү мөмкинлеген хәбәр итте. Әлеге методик ярдәм милли уен коралларына музыка язу юнәлешен дә үз эченә ала.

  • Рәшит Кәлимуллин Татарстан Республикасы музыка сәнгате үсеш концепциясен булдыру проблемасын күтәреп чыгучыларның берсе.

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10