ҺАВА ТОРЫШЫ +16 oC

Яңалыклар

барлык хәбәрләр Татарстан Россия

Җәмгыять

Саба WorldSkills һәм WorldSkills Kazan 2019 әләмнәрен кабул итте

18 июнь 2019, 23:00 , Фото: saby-rt.ru/

Саба WorldSkills һәм WorldSkills Kazan 2019 әләмнәрен кабул итте Район башлыгы Рәис Миңнеханов WorldSkills Kazan 2019 әләменә Саба гербын беркетте.

(Саба, 18 июнь, "Татар-информ, "Саба таңнары", Фәнил Мәүлетов). Саба районының быелгы  Сабан туе WorldSkills һәм WorldSkills Kazan 2019 әләмнәрен кабул итү белән дә аеруча нык истә калды. Бу турыда җирле басма хәбәр итә.

"Хөрмәтле сабалылар! Бүген сезгә WorldSkills әләмен олылау тантанасында катнашу өчен уникаль мөмкинлек бирелә. Алкышлыйк әле барыбыз да", – диде бәйрәмне алып баручы. Чараны оештыру комитеты вәкилләрен район чигендә яшьләр белән эшләү һәм спорт бүлеге җитәкчесе Ирек Гарипов, "Яшьлек" мәдәни-спорт үзәге директоры Динар Маканов каршы алды.

Әләмнәр исә шунда ук WorldSkills чемпионатында катнашкан Саба аграр көллияте студентлары кулына күчте. Сабантуй мәйданына кергәч, флаглар һәр оешма-предприятиедән билгеләнгән вәкилләр эстафетасыннан үтте. Район башлыгы Рәис Миңнеханов милли бәйрәмебездә WorldSkills әләме эстафетасы узуын зур дәрәҗә, киләчәктә дә олы ышаныч буларак бәяләде.

"Һөнәрле үлмәс, һөнәрсез көн күрмәс, дигәннәр бабаларыбыз. Һөнәрле кеше – ул бай кеше. WorldSkills кысаларында Һөнәрле кешегә игътибар нык арта. Бу өлкәдә районыбызда балалар бакчаларынннан башлап, зур эшләр башкарылды.

Казанда 22-27 август көннәрендә узачак 45 нче WorldSkills Эшче һөнәрләр дөнья чемпионатын исә мөмкинлек булганда барып күрергә кирәк. Моның өчен аэропорт янында зур биналар төзелде. Бигрәк тә моны киләчәгебез булган балалар күрергә тиеш",– диде ул һәм WorldSkills Kazan 2019 әләменә Саба гербын беркетте.

Оештыру комитеты тарафыннан аңа чемпионат флаглары эстафетасында катнашучы сертификаты тапшырылды.

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10