ҺАВА ТОРЫШЫ +17 oC

Яңалыклар

барлык хәбәрләр Татарстан Россия

Җәмгыять

Казанда шәһәркүләм чыгарылыш кичәсе “Казан-Арена” стадионы янында узачак

24 июнь 2019, 12:52 , Фото: Ильнар Тухбатов/архив

Казанда шәһәркүләм чыгарылыш кичәсе “Казан-Арена” стадионы янында узачак 26 июньдә узачак бәйрәмдә шәһәрнең 164 мәктәбеннән 5,7 мең чыгарылыш укучысы катнашачак.

(Казан, 24 июнь, “Татар-информ”, Вероника Ваганова). Казанда 26 июньдә узачак беренче шәһәркүләм чыгарылыш кичәсендә башкаланың 164 гомуми белем бирү мәктәбеннән 5,7 мең чыгарылыш укучысы катнашачак. Бәйрәм “Казан-Арена” стадионы янындагы мәйданда булачак. Бу хакта Казан мэриясендә узган эшлекле дүшәмбедә Балалар һәм яшьләр эшләре комитеты рәисе Айрат Фәизов әйтте.

“Бәйрәм кунакларын кызыклы концерт программасы көтә. Татар эстрадасы җырчысы Гөлназ Батталова һәм “Волга-Волга” вокал-инструменталь төркем чыгыш ясаячак. Шулай ук яшьләр арасында популяр булган Россия эстрадасы йолдызлары – ТНТ каналындагы “Песни” телевизион шоуның икенче сезоны җиңүчесе, безнең якташ, рэпер Slava Slame, танылган музыкаль төркем "Мальбэк һәм Сюзанна” катнашачак”, - диде спикер.

Бәйрәм дәвамында 150 пар мәктәп вальсы бииячәк. Шуннан соң күккә күгәрченнән очырачаклар.

Шулай ук сәхнәдән Бөтенроссия һәм халыкара олимпиада җиңүчеләрен бүләкләячәкләр.

“Мәктәп укучыларының Бөтенроссия олимпиадалары нәтиҗәләре буенча шәһәрләр рейтингында, Мәскәү һәм Санкт-Петербургтан гына калышып, Казан алтынчы ел инде өченче урынны саклый”, - диде спикер.

Кичә ахырында чыгарылыш укучылары Sforzando оркестрына һәм A-class рок-төркеменә кушылып, “Куда уходит детство” җырын караокега башкарачак. Бәйрәм 21:00 сәгатьтә салют белән төгәлләнәчәк.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10