Башкортстанның яңа гына тәгаенләнгән Президенты Рөстәм Хәмитов үз вазыйфаларына керешеп яңа фәрманнарны имзалый башлады

(Уфа, 20 июль, “Татар-информ”, Фәнис Фәтхуллин). Башкортстанның яңа гына тәгаенләнгән Президенты Рөстәм Хәмитов үз вазыйфаларына керешеп яңа фәрманнарны имзалый башлады. Чираттагы фәрман республика хөкүмәтенә кагылышлы. Рөстәм Хәмитов фәрманына ярашлы, Мортаза Рәхимов президентлыгында эшләгән хөкүмәт отставкага китә, ләкин ул, яңа Министрлар Кабинеты оештырылганчы, үз вазыйфаларын үтәүне дәвам итәчәк.
Рөстәм Хәмитов әйтүенчә, яңа хөкүмәтне төзү озакка сузылмаячак. Аның сүзләренчә, эш күп, тезелеп торган проблемалар да баштан ашкан, шуңа күрә дә озын-озак селкенергә вакыт юк. Рөстәм Хәмитов июль азагына ук яңа хөкүмәт составы игълан ителәчәк, дип ышандыра.
Рөстәм Хәмитов социаль мәсьәләләрне хәл итү буенча да яңа фәрманнар кабул итә. Иң беренче ул мәктәпләрне автобуслар белән тәэмин итүгә кагылышлы карар чыгарды. Аннан соң хастаханәләрдә дәваланып чыккан кешеләргә шифаханәләрдә саулыкларын ныгыту өчен өстәмә мөмкинлекләр тудыру хакында да фәрманын имзалады яңа Президент.