Үзәк Татарстан башкаласындагы Физкультура, спорт һәм туристлык академиясе территориясендә урнашыр дип көтелә

(Казан, 30 июль, «Татар-информ»). Бүген Мәскәүдә Халыкара студентлар спорты федерациясе (FISU), РФ Спорт, туристлык һәм яшьләр сәясәте министрлыгы, Россия студентлар спорт берлеге һәм Татарстан Республикасы арасында Россиядә FISU ның Халыкара белем бирү үзәген төзергә ниятләү турындагы меморандумга кул куелды.
Документны Халыкара студентлар спорты федерациясе (FISU) президенты Джордж Киллиан, РФ спорт, туристлык һәм яшьләр сәясәте министры Виталий Мутко, Россия студентлар спорт берлеге президенты Олег Матыцин һәм Татарстан Республикасы Президенты Рөстәм Миңнеханов имзалады.
Меморандумга “Россия – спорт державасы” Халыкара спорт форумы кысаларында кул куелды.
Россиядә FISU ның Халыкара белем бирү үзәге Казанда студентлар спорты өлкәсендәге Халыкара, белем бирү, спорт һәм мәдәни программаларны гамәлгә ашыру өчен төзеләчәк.
Үзәк Татарстан башкаласындагы Физкультура, спорт һәм туристлык академиясе территориясендә урнашыр дип көтелә. Моннан тыш, үзәк эшчәнлеге өчен 2013 елгы Универсиада мирасы спорт объектлары да эшкә җигеләчәк, дип хәбәр итә ТР Президентының матбугат хезмәте.
“Без дәүләттән зур ярдәм алдык һәм илдә иң заманча спорт үзәге төзергә әзербез”, - диде Татарстан башлыгы Рөстәм Миңнеханов меморандумга кул кую процедурасы кысаларында.