Арча районы Түбән Мәтәскә урта мәктәбендә барлык фәннәрне дә татарча укыган Фәнзилә Мостафина рус әдәбиятыннан – 100, рус теленнән 88 балл җыйган

(Казан, 16 август, “Татар-информ”, Римма Гатина). Бердәм дәүләт имтиханын тапшырганда, укучыларга тел ягыннан кыенлык булмасын өчен, төшенчәләрне, терминологияне ике телдә дә үзләштерерлек итеп бирергә кирәк. Бүгенге көндә моның белән шөгыльләнмичә булмый. Бу инде урта сыйныфлардан башлап югары сыйныфларга кадәр алып барыла торган эш юнәлеше булып торырга тиеш. Бу хакта Арчада узган киңәшмәдә ТР Мәгариф һәм фән министрының беренче урынбасары Данил Мостафин белдерде.
Аның сүзләренә караганда, Бердәм дәүләт имтиханнары нәтиҗәсе дә укытучы хезмәтен бәяләүдә бер критерий булып тора. “Әгәр Бердәм дәүләт имтиханнары күрсәткечләренә күз салсак, шәһәр татар мәктәпләре һәм татар классларында укучылар, рус мәктәпләре укучылары белән чагыштырганда, химиядән, информатикадан, тарихтан, географиядән, инглиз теленнән белемнәренең өстен булуын күрсәттеләр.
Авыл мәктәпләрендә укучы татар балалары да сынатмадылар. Рус мәктәпләрендә укучыларның белемнәренә караганда, математика, физика, химия, информатика, тарихтан баллары югары булды”, - диде Д.Мостафин.
Мәсәлән, Арча районы Түбән Мәтәскә урта мәктәбендә барлык фәннәрне дә татарча укыган Фәнзилә Мостафина рус әдәбиятыннан – 100, рус теленнән 88 балл җыйган.
“Бик сирәкләр генә шундый уңышка ирешә ала. Бу – югары күрсәткеч. Ул күптән хыялланган КФУның татар журналистикасы бүлегенә укырга кергән. Яр Чаллы егете Ленар Закиров рус теленнән 98 балл җыйган. Бу безнең мәктәпләрнең потенциалын, аларның мөмкинлеген күрсәтә.
Әлбәттә, болар белән генә тынычланырга ярамый. Рус теле, биология, җәмгыять белеме, чит телләрдән, рус мәктәбендә укучыларга караганда, нәтиҗәләр түбәнрәк булды”, - дип билгеләп үтте урынбасар.
2009-2010 уку елында тугызынчы сыйныфлар йомгаклау аттестациясе вакытында предметларны БДИ рәвешендә, ә татар телен традицион формада тапшырды. Бу уку елында бу предметны да БДИ формасында бирү буенча эш алып барылачак.