Мәскәүдә сәламәтлек саклау өлкәсен модернизацияләүнең төбәк программаларын булдыру мәсьәләсенә багышланган киңәшмә үтте

(Казан, 19 август, “Татар-информ”). Мәскәүдә сәламәтлек саклау өлкәсен модернизацияләүнең төбәк программаларын булдыру мәсьәләсенә багышланган киңәшмә үтте. Анда ТР сәламәтлек саклау министры Айрат Фәррахов һәм министр урынбасары Әнәс Гыйльманов катнашты.
«Сәламәтлек саклау өлкәсендә модернизацияләү, беренче чиратта, барлык россиялеләр өчен сыйфатлы медицина ярдәмен күрсәтү шартларын тудыру. Сез халык фикеренә колак салырга тиеш. Хәзер модернизацияләү дип бөтен эшләгән эшләрне дә атыйлар. Әмма без аңлыйбыз: модернизация - һәр төбәктә яшәүчеләргә сыйфатлы медицина ярдәмен алуга шартлар тудыру ул”, - диде РФ сәламәтлек саклау һәм социаль үсеш министры Татьяна Голикова.
Үз чыгышында ул “Мәҗбүри медицина иминияте” законын карауны октябрь аена күчерү кирәклеген дә әйтте. Бу әлеге законны сәламәтлек саклау өлкәсендәге башка законнар, аерым алганда, “Халык сәламәтлеген саклау турында”гы һәм пациентлар хокукларын яклауга караган законнар белән синхронлаштырырга мөмкинлек бирәчәк, диде ул. Бу турыда ТР Сәламәтлек саклау министрлыгының рәсми сайты хәбәр итә.