Бу санны арттыру көндәлек яңгырларның корылык вәзгыятен сизелерлек яхшыртуы белән бәйле

(Казан, 28 август, «Татар-информ», Ирина Игнатьева). Татарстанда көзге культуралар чәчү мәйданнарын 603 мең га кадәр җиткерү планлаштырыла. Бу санны арттыру көндәлек яңгырларның корылык вәзгыятен сизелерлек яхшыртуы белән бәйле. Бу хакта “Татар–информ” агентлыгы хәбәрчесенә ТР Авыл хуҗалыгы һәм азык–төлек министрлыгында белдерделәр.
Искә төшереп үтәбез, узган ел көзге чәчүлекләр 809 мең гектарны били иде. 400 мең гектардан артык мәйданга көзге бодай чәчелгән, 90 мең гектарны көзге тритикале били иде, калган мәйданда – көзге арыш. Быел һава шартлары яхшы булмау сәбәпле, аграрийлар көзге культураларны зур мәйданга чәчәргә шикләнә. Башта 300 мең гектарга гына чәчәргә планлаштырганнар иде, әмма соңгы вакытта яуган яңгырлар яхшы нәтиҗә бирде.
Бүгенге көндә республикада 185,1 мең гектарга көзге культуралар чәчелгән, бу фаразланган күрсәткечләрнең 31 процентын тәшкил итә. Бу авыл хуҗалыгы эшләрен башкаруда Әлки районы игенчеләре лидерлар рәтендә, алар 66 процент мәйданда эшләрне төгәлләгән, Арча – 64 процент, Яшел Үзән – 58, Әтнә - 54 процент, Саба - 51.
Буа, Чүпрәле, Мөслим, Түбән Кама, Тәтеш һәм республиканың башка районнарына да көзге чәчү эшләрен тизләтергә кирәк, дип саныйлар ТР Авыл хуҗалыгы һәм азык–төлек министрлыгында.