“Әлеге төр явызлыкка каршы көрәш – дөнья җәмәгатьчелегенең иң зур һәм катлаулы бурычларының берсе. Аны бары тик бердәм булып кына җиңеп була”, - диелә мөрәҗәгатьтә

(Казан, 3 сентябрь, “Татар-информ”). Татарстан Республикасы Дәүләт Советы Рәисе Фәрит Мөхәммәтшин Терроризмга каршы көрәштә бердәмлек көнендә республика халкына мөрәҗәгать белән чыкты.

“Хөрмәтле татарстанлылар! 3 нче сентябрьдә терроризмга каршы көрәштә бердәмлек көне уңаеннан Россия Федерациясе халыклары белән бергә без бернинди гаепсезгә гомерләре өзелгән терроризм акты корбаннарын искә алабыз.

Терроризм – бүгенге көндә иң дәһшәтле, кан койгыч социаль күренеш. Аның төп максаты – физик көч кулланып халыкны куркыту, төрле дин һәм милләт кешеләренең бер-берсенә ышанычын бетерү, дәүләт институтларына психологик басым ясарга омтылу, явыз максатларны тормышка ашыру өчен кешеләрне җәлеп итәргә тырышу. Әлеге төр явызлыкка каршы көрәш – дөнья җәмәгатьчелегенең иң зур һәм катлаулы бурычларының берсе. Аны бары тик бердәм булып кына җиңеп була. Бер гаепсез меңләгән кешенең гомерен өзгән, газап һәм тилмерүләр китергән бу рәхимсез җинаятьләргә беркем дә битараф калырга тиеш түгел.

Татарстан җирендә күп гасырлар дәвамында йөздән артык милләт вәкиле дус һәм тату яши. Үзара аңлашу, бер-берсенең гореф-гадәтләренә, мәдәни һәм рухи кыйммәтләренә карата ихтирамлы мөнәсәбәт– республикабызда тынычлыкның һәм иминлекнең төп нигезе.

Россия Федерациясендә терроризм актларын булдырмас өчен, эшлекле һәм төгәл карарлар кабул ителә. Кешенең бәхетсезлегенә битараф булмау, җаваплылык һәм саклык күрсәтү – үзен чын гражданин итеп таныган һәркемнең олы бурычы. Уртак йортыбыз иминлеге, якыннарыбыз, туганнарыбыз, балаларыбыз, оныкларыбыз исәнлеге безнең һәрберебездән тора дип әйтергә мөмкин. Ватаныбызның бүгенгесе һәм киләчәге өчен без гражданлык хисен, милләтләр бердәмлеген ныгытачакбыз, милли, дини яки социаль экстремизмга каршы көрәш алып барачакбыз.

Хөрмәтле татарстанлылар! Безнең илебез бер. Ватаныбызның көч-куәтен арттыру, бөтенлеген, тынычлыгын саклау, терроризмның һәртөрле күренешләренә каршы тору өчен барын да эшли алачагыбызга мин чын күңелемнән ышанам”, - диелә мөрәҗәгатьтә.