Бәйгегә тәкъдим ителә торган коллекцияләрдәге модельләр башны һәм тәнне тулысынча капларга, үтәкүренмәле булып, гәүдәгә сыланып торырга тиеш түгел

(Казан, 3 сентябрь, “Татар-информ”). Быел мөселман киносы фестивале кысаларында узачак «Islamic-clothes» мөселман киеме дизайнерлары халыкара бәйгесенә 24 заявка килгән.
ТР Мөслимәләр берлеге рәисе Наилә Зиһаншина сүзләренчә, күпчелек заявкалар – Татарстаннан. Шулай ук Мәскәү, Санкт-Петербург, Ивановодан коллекцияләр көтелә. Чит илләрдән Иран һәм Индонезия бар. Төркия белән сөйләшүләр алып барыла.
Заявкалар 10 сентябрьгә кадәр кабул ителә.
Әлеге конкурс “Татарстан мөслимәләре берлеге” иҗтимагый оешмасы инициативасы белән оештырыла. Бу проектны тормышка ашыруда ТР Мәдәният министрлыгы, Россия һәм Татарстан дизайнерлары берлеге булышлык күрсәтә.
Бәйгегә тәкъдим ителә торган коллекцияләрдәге модельләр башны һәм тәнне тулысынча капларга, үтәкүренмәле булып, гәүдәгә сыланып торырга тиеш түгел.
Күренекле мәдәният һәм җәмәгать эшлекләреннән, мода индустриясендәге танылган шәхесләрдән торган жюри, модельләрнең яңалыгына, һөнәри осталык дәрәҗәсенә, сәнгати матурлыгына, коммерция перспективасына карап, бәя бирәчәк.