VI Казан халыкара мөселман киносы фестиваленең конкурс программасы кысаларында кино сөючеләр чит илләрдә һәм Россиядә төшерелгән 29 премьераны күрә алачак

(Казан, 7 сентябрь, “Татар-информ”). VI Казан халыкара мөселман киносы фестиваленең конкурс программасы кысаларында кино сөючеләр АКШ, Франция, Алжир, Мисыр, Иран, Иордания, Норвегия, Палестина, Италия, Бөекбритания, Россиядә төшерелгән 29 премьераны күрә алачак. Россия “Мәккәгә сәяхәт” дигән проектны тәкъдим итәчәк.
Фильмның режиссеры – АКШтан Брюс Нейбаер. “Мәккәгә сәяхәт” фильмын төшерүчеләр төркеме, шәһәрдән 60 метр биеклеккә күтәрелеп, хаҗны IMAX форматында төшерә. Шулай итеп, тамашачы виртуаль режимда Мәккәгә “сәяхәт” кыла алачак. Фильм “Тулы метражлы уен фильмы” номинациясендә тәкъдим ителә. Аның премьерасы 18 сентябрьдә “Родина” кинотеатрында күрсәтеләчәк. Бу турыда фестивальнең матбугат хезмәте хәбәр итә.