Махсус комиссия әгъзалары мәктәпкәчә учреждениеләрнең яңа уку елы башына әзерлеген бәяли

(Түбән Кама, 7 сентябрь, «Татар-информ», Сергей Толмацкий). Түбән Камада мәктәпкәчә учреждениеләрне яңа уку елына кабул итә башладылар.
Берничә көн эчендә махсус комиссия әгъзалары – янгын күзәтчелеге, сәламәтлек саклау һәм мәгариф идарәсе, кулланучыларның хокукларын яклау һәм кеше иминлеге өлкәсендә күзәтчелек Федераль хезмәтенең ТР буенча идарәсе хезмәткәрләре һәм муниципаль хакимият вәкилләре алдында шәһәрнең 60 тан артык балалар бакчасын тикшерү бурычы тора.
Кичә авыллардагы мәктәпкәчә учреждениеләрне (алар Түбән Кама районында барлыгы 23) кабул итү төгәлләнде. Аларда кимчелекләр ачыкланмады, барысы да балаларны каршы алуга яхшылап әзерләнгән.
Махсус комиссияләр эшенең гомуми нәтиҗәләре октябрь аенда, мәктәпкәчә белем бирү хезмәткәрләренең педагогик конференциясендә игълан ителәчәк. Шәһәр һәм райондагы иң яхшы балалар бакчалары “Сәламәтлек балалар бакчасы”, “Балалар бакчасы – полимәдәни киңлек”, “Балалар бакчасы – уеннар дөньясы”, “Балалар бакчасы – иҗат территориясе” һәм “Балалар бакчасы – балачак академиясе” номинацияләрендә билгеләнәчәк. Иң күп балл җыйган призерларны I, II һәм III дәрәҗә дипломнар көтә. Абсолют җиңүче “Ел балалар бакчасы” титулына ия булачак.