8 ай эчендә компания 17,2 миллион тонна нефть чыгарган

(Казан, 8 сентябрь, «Татар-информ», Әнвәр Маликов). “Татнефть” ААҖ 2010 елның 8 аенда 17215,803 мең тонна кара алтын чыгарган. Компаниядән хәбәр итүләренчә, бу 2009 елның шул чоры белән чагыштырганда 0,1 процентка артык, 1,8 проценты – планнан тыш. Август аенда 2200,271 мең тонна нефть табылган, бу пландагыдан 2 процентка күбрәк.
“Татнефть” компанияләр төркеме буенча 8 ай эчендә 17380,949 мең тонна нефть чыгарылган, шуның 306,587 мең тоннасы – планнан тыш. 8 айда 438,6 мең метр (моннан бер ел элек 398 мең метр) җир борауланган. Шуның 364,3 мең метры (2009 елда – 334 мең метр) - “Татнефть” ААҖ өчен. 350 мең метр – эксплуатация, 14,3 мең метр разведка ясау максатыннан борауланган.
Заказчыларга 295 скважина (2009 елның 8 аенда – 246) төзеп тапшырылган. Шуның 216 сы (моннан бер ел элек – 203) - “Татнефть” ААҖ өчен.