Анда Татарстан территориясен һәм халкын табигать бәла-казаларыннан, техноген характердагы гадәттән тыш хәлләрдән саклау турында әйтелә

(Казан, 10 сентябрь, “Татар-информ”, Миләүшә Низаметдинова). Бүген “Корстон” сәүдә-күңел ачу комплексында ТР Хөкүмәте һәм РФ Гражданнар оборонасы, гадәттән тыш хәлләр һәм табигать бәла-казалары нәтиҗәләрен бетерү буенча министрлыгы арасында мөһим килешү имзанды.
Әлеге документта Татарстан территориясен һәм аның халкын табигать бәла-казаларыннан һәм техноген характердагы гадәттән тыш хәлләрдән саклау, аларның нәтиҗәләрен бетерү, муниципальара һәм төбәкара характердагы һәлакәтләрдән коткару һ.б. кичектергесез эшләр оештыру һәм үткәрү буенча бер-берсенә үзләренең вәкаләтләрен гамәлгә ашыруны өлешчә тапшыру турында сүз бара. Анда, шулай ук, дәүләт янгынга каршы көрәш хезмәте көчләре белән янгыннар сүндерү, гражданнар оборонасы буенча муниципальара һәм төбәкара дәрәҗәдәге чараларны оештыру, республика территориясендәге сулыкларда кешеләрне эзләү һәм коткару эшләрен башкару турында да әйтелә.

ТР Президенты Рөстәм Миңнеханов һәм РФ гражданнар оборонасы, гадәттән тыш хәлләр һәм табигать бәла-казалары нәтиҗәләрен бетерү буенча министры, армия генералы Сергей Шойгу тарафыннан имзаланган әлеге килешү 2016 елның 31 декабренә кадәр гамәлдә булачак.